Pa Joyce Perreira, kende ta vice presidente di e Fundacion Lanta Papiamento, lo ta bon pa mas scol haci e idioma Papiamento uno oficial den enseñansa.
Awor aki ta preparando mas scol pa drenta e proyecto. Tin Papiamento na scol secundario. El a drenta hasta klas di examen HAVO/VWO. Mavo e tabata tey caba y e ta na EPB. A prepara den pasado maestro di 3 grado di Papiamento. Ta bay cuminsa cu Papiamento Bachelor, y hunto cu Corsou, tin e Master di Papiamento tambe, cu ya caba tin diferente hende cu a gradua pa e Master, cu ta necesario pa haci investigacion, pa por traha na e nivelnan mas halto di enseñansa. Tin grupo di traductor cu tur departamento di Gobierno mester tin awor aki un grupo di corector. Un corector pa por coregi e Papiamento cu nan ta uza den e carta of documentonan oficial di cada departamento. Nan por traduci tambe di Hulandes pa Papiamento.
Tin un sector cu te ainda ta discrimina Papiamento, cual ta e sector hudicial, cu tin para den e ley, cu te ainda e idioma di husticia ta Hulandes, cu masha hopi problema.
Un di e problemanan ta, cu e polisnan mester skirbi nan rapport na Hulandes, y esey por tin masha hopi problema. Un hende cu no ta domina Hulandes bon, tin cu busca un traductor, pa e por combersa of compronde hues. Tin basta problema cu esey. Ta contento cu e ley, pero e no ta cla. No ta asina cu e ley ta papia di uzo di Papiamento den comunidad, con e mester ta. Uzo den prensa, uzo den e diferente areanan di enseñansa, den comercio. En realidad, e ley mester cubri tur area di comunidad, plus husticia. Tin hopi co’i haci ainda na e ley. Segun Perreirra, un di e tareanan di e fundacion ta pa habri e discusionnan atrobe, pa wak con por amplia e embergadura di e ley aki.