MIAMI, Florida – FBI a aresta un muhe acusa di filtra un documento clasifica na e medio di comunicacion The Intercept, na Mei, a bisa un funcionario federal halto na NBC News.
Reality Leigh Winner, di 25 aña y residente di Georgia, a wordo aresta diasabra na su cas y a enfrenta un solo acusacion di “recolecta y manda informacion clasifica na un medio di comunicacion.”
The Intercept a presenta dialuna un documento clasifica di e Agencia di Siguridad Nacional (NSA), cu ta detaya e esfuersonan di e Gobierno Ruso pa hack un compania di software electoral aproximadamente un siman prome cu e eleccionnan.
E documento tabata clasifica den un di e nivelnan mas halto.
FBI a bisa, cu ora cu nan a acerca Winner, el a admiti di a imprimi e documento, a saca for di su luga di trabao y mand’e via post na e “red di noticia online.”
E noticia di e detencion a wordo anuncia pa e Departamento di Husticia, apenas un ora despues cu The Intercept a publica e informacion.
Di acuerdo cu e informe publica pa The Intercept, hackernan Ruso a ataca por lo menos un proveedor Mericano di software electoral, dianan prome cu e eleccion presidencial di 2016, di acuerdo cu un documento clasifica publica dialuna.
E rapport di inteligencia di Gobierno ta insinua cu e hackeo relaciona cu e eleccion a penetra den e sistema di votacion di Merca mas di loke sa previamente.
E rarpport clasifica di cinco pagina di e Agencia di Siguridad Nacional a wordo publica riba internet pa The Intercept. E no ta bisa si e intrusion tabata tin algun efecto den e resultado electoral.
E rapport, cu fecha dia 5 di Mei, ta bisa cu e miembronan di inteligencia militar di Rusia, a ataca un compania di software electoral Mericano y a manda email na mas di 100 funcionario electoral na fin di October y principio di November pa adkiri fraudulentamente informacion confidencial.
Fuente: www.telemundo.com