PARIS, Francia – Un vocero di Emmanuel Macron, e candidato centrista na e presidencia di Francia, a acusa Rusia diamars di propaga rumornan falso den medionan estatal Ruso pa desprestigia su campaña, loke Kremlin ta nenga.
Benjamin Griveaux, vocero di Macron, a acusa Kremlin di a ehecuta un campaña di descredito contra e ex minister di Economia (di gabinete di Francois Hollande), di 39 aña, ardiente defensor di Union Europeo, cu ta sigui subi den e sondeonan den menos di tres luna di e comicionan presidencial.
“Kremlin a scoge su candidatonan, Francois Fillon y Marine Le Pen,” Griveaux a bisa camaranan di canal iTELE, den referencia respectivamente na e candidato conservador di e Republicanonan cu ta defende un dialogo mas estrecho cu Rusia y na e lider di partido di extrema derecha Frente Nacional antiUE.
Y p’esey, el a agrega, “promove na e dos candidatonan aki den e medionan estatal.” Den su mira tey e agencia di prensa Sputnik y e canal di television Russia Today, “dos medio 100% financia pa Kremlin y cu, obhetivamente, ta ehecuta un campaña di descredito contra e candidatura di Emmanuel Macron.”
E medionan Ruso, hopi presente riba internet, a wordo acusa di lansa atakenan contra e candidato democrata Hillary Clinton pa faborece den e eleccionnan Mericano na su rival Republicano Donald Trump, otro partidario di un acercamento cu Moscu.
Destina na un publico internacional, e medionan di comunicacion aki ta defundi, segun nan detractornan ta “propaga” na fabor di e interesnan Ruso den temanan relevante como e guera na Siria of futuro di Union Europeo.
Fuente: El Espectador