Recientemente Director di Banco Social di Aruba SVb conhuntamente cu e comission “Fitness pa Bida” a bishita e fundacion “The Golden Agers” cu ta uza YMCA San Nicolas como nan sede.
E bishita special aki tabata pa entrega un cheque di Afls 5000,= na e organisacion. Comision Fitness pa Bida den cuadro di celebracion di 30 aña di SVb a organisa un caminata cu resultado sumamente exitoso. Cu apoyo di tur colega di SVb a bende casi mil carchi y e participacion tabata tremendo.
Despues di evalua diferente organisacion di hende grandi, a scoge “The Golden Agers” e organisacion pa nos grandinan di mas bieu na Aruba. The Golden Agers ta traha estrechamente cu YMCA na beneficio di nos grandinan pariba di brug. Nan ta reuni cu un grupo di hende grandi di San Nicolas y vecindario pa tene nan activo, ta haci obra di man, Tai Chi, sali bishita diferente lugar riba nos isla, organisa Bingo y Speldag. Un actividad cu ta hopi importante pa e grupo ta nan dianan di bijbel les cu ta hopi gusta pa e grandinan cu ya cu tur ta Cristian.
E meta principal di The Golden Agers su directiva ta pa nos grandinan no mester sinti soledad, e motibo hopi biaha di depresion cerca nos grandinan. Nan ta di pensamento cu mester evita soledad lo mas tanto posibel, esaki sigur tabata un di e metanan principal di sra. Eleonora Thompson fundadora di e organisacion (QPD). The Golden Agers a keda funda na 1962 y a caba di cumpli 54 aña di existencia.
E organisacion a keda masha masha contento cu e donacion cu nan a ricibi y a gradici director di SVb Ir. Edwin Jacobs, Comision Fitness pa Bida y tur empleadonan di SVb cu a contribui pa por a yega na e bunita gesto aki.
Durante di e bishita aki tambe SVb a haci entrega di un aprecio na hobennan di Rode Kruis cu riba dia di e actividad a colabora boluntariamente pa asisti SVb durante di e caminata.
Director a desea e organisacion tur cos bon den futuro y ta spera nan por keda dedica tempo, atencion y cariño na nos grandinan di pariba di brug.