Director di SVB, sr. Edwin Jacobs, ta comparti con e situacion di SVB ta canando. For di awe, 10 di december te cu 17 di december por haci peticion pa Loonsubsidie pa luna di december, mirando cu ta dianan liber a opta pa habri e proceso di aplicacion mas trempan.
E ta bisa cu pa 18 y 19 tur esnan cu aplica lo ricibi nan loonsubsidie, esnan cu keda falta documentacion por re aplica. Por keda cla pa 23 di December 2020 pa paga e loonsubsidie. Sr. Jacobs ta splica cu tur esnan cu ta cay na remarke pa e loonsubsidie ta pa tur dunado di trabou cu ta inscribi na SVB for dfi 14 maart 2020 ‘e compania vulnerabe’l.
Sr. Jacobs ta bisa cu e ta keda rond den suma di 20.800 pa 21.000 persona cu ta haya e loonsubsidie. E companianan aki ta activo for di cuminsamento di pandemia cu ainda ta sigui draai, sinembargo e benta no ta mescos cu prome.
“E medida cu gobierno a tuma pa tin un control riba e pandemia. Un total di 3166 empresa a wordo cualifica manera vulnerabel. Pa e luna di november a aplica 1610 empresa, a duna un total 29.5 miyon pa 20.774 trahado”, e ta remarca.
Pa controla si tur cos ta cana manera mester ta, e ta splica cu nan tin un control interno cu ta supervisa pa tur cos cana na ordo, pero e ta bisa cu CAFT ta apunta su accountant pa controla SVB si ta cumpliendo cu tur rekisito di ley.
E registracion ta tuma luga online, caminda tur empresa cualifica lo ricibi un e-mail manera tur luna. Tin riba e-mail ki fecha y ora e peticion ta habri. Riba e peticion mester declara cu ta cumpli cu tur pago di prima y belasting. Ora declara esaki ta bay pa formulario di tur trahado pa nan firma esaki, yena e porcentahe di salario, upload y haci entrega. Tambe mester upload e perdida di benta pa entrega e peticion.
Sr. Jacobs ta bisa cu ta un proceso facil di tur luna. Pa locual ta trata otro aña ta spera economia drecha bek, pero pa e prome 6 luna di 2021 por cumpli cu tur obligacion te cu juni. Nan lo keda wak con e aña ta cuminsa y evalua e situacion.