Sv Dakota ta desea di splica e motibonan pa kiko a pidi (arbitrage y) revision di e
decision di Comishon di Apelacion (den e caso Sv Nacional vs Sv Dakota). Un herziening por wordo pidi ora tin hechonan nobo y ora ta trata algo excepcional. Den e caso aki Sv Dakota ta di opinion cu esaki ta e caso.
Sv Dakota ta sigur cu Comishon di Apelacion no a tene cuenta cu derechonan fundamental ancra den Huishoudelijke Reglement di AVB (HR) y no a tene cuenta cu e
principionan di Behoorlijk Bestuur cu cualnan principionan Comision di Apelacion tambe tin cu tene cuenta cu nan ora di trata un caso y tuma un decision.
Loke Sv Dakota tabata desea cu e herziening ta pa hanja e oportunidad pa wordo skucha pa asina Comishon di Apelacion tuma un decision a base di puntonan treci dilanti pa tur
partidonan den e caso aki. Sv Dakota tabata desea un caso justo, cual den e caso aki no
tabata asina.
Punto 1: Comision di Apelacion a trata e caso cu 4 di su 7 miembronan, mientras mester
tin presente minimo cinco (5) miembro pa por tuma un desicion valido. Esaki conforme
articulo 26, inciso 1 conhunto cu articulo 26, inciso 10 HR.
Punto 2: Un miembro di Comishon di Apelacion cu a atende e reunion y a tuma parti na e
decision ta un ex miembro di e Bestuur di Sv Nacional y kende a hunga futbol pa e
organisacion. Articulo 26, inciso 10 HR ta prescribi cu un miembro di Comision di Apelacion no por participa na reunion ni tuma parti na e decision ora ta trata casonan di su organisacion. Ta pa tal motibo un miembro di Comision di Apelacion cu ta miembro
tambe di Sv Dakota corectamente no a participa na e reunion y decision den e caso aki.
E ex miembro di bestuur di Sv Nacional tambe Mester a keda sin particpa na e reunion y
decision den e caso aki. Aki tin en todo caso aparencia di partidista (schijn van
partijdigheid), cual tambe ta motibo pa no participa na reunion y decision den e caso aki.
Remarkabel ta cu casi di biaha despues cu Comision di Apelacion a tuma su decision,
sr. Peterson (mihor conoci como “Jan Poets”) a pone riba su Facebook Page cu Sv Nacional a gana e apelacion. Na es momento ey Bestuur di AVB ni Sv Dakota tabata na
altura cu un decision a wordo tuma. Sv Dakota a wordo informa di e decision e dia
despues den oranan di atardi.
Punto 3: Comision di Apelacion no a tene cuenta cu articulo 63, inciso 3 HR cu ta bisa
cu e partido contrario, den e caso aki Sv Dakota, tin e derecho pa trece su puntonan
dilanti y tambe pa skucha testigo. Sv Dakota no a haya e oportunidad di trece nada
dilanti den e caso aki. Aunke cu Sv Dakota a pidi por escrito (via email) na diferente
ocasion pa wordo skucha y un miembro di Comision di Apelacion a informa na
miembronan di Sv Dakota cu nan lo wordo skucha, e Comision di Apelacion a tuma su
decision sin skucha Sv Dakota. Es mas, Sv Dakota no a hanja ni e apelasion di Sv Nacional pa wak y no tabata sa mes a base di kiko a apela te despues di e decision.
E derecho di un partido pa defende su mes y pa wordo skucha den un caso ta basa tambe riba e beginsel van behoorlijk bestuur di “Hoor en Wederhoor”. Es decir tur partido
den un caso mester wordo skucha. Esaki ta un di e basenan fundamental cu den cualkier tipo di decision Mester tene cuenta cune, y si no hasi esaki e decision ta uno co no por keda para. No ta comprendibel con Comision di Apelacion ta skirbi den su decision cu e ta suficiente informa a base di e documentonan ricibi y pesey no a hanja necesario pa skucha Sv Dakota.
Pa prome, Comision di Apelacion no por kita e derecho di Sv Dakota pa defende su mes
y pa wordo skucha a base di e articulo 63 HR y base di e beginsel van behoorlijk bestuur
di “Hoor en Wederhoor”. Pa di dos, Sv Dakota na ningun momento a haya e oportunidad
pa entrega documentonan pa defende su mes contra di e apelacion di Sv Nacional. Sv
Dakota no a hanja e apelacion ni pa lesa, aunke cu a pidi pa haya un copia di esaki. Pa
di tres, Comision di Apelacion no por bisa cu e tin suficiente documentonan pa dicidi riba
e apelacion di Sv Nacional, mientras e no a duna Sv Dakota e oportunidad pa entrega documentonan den apelacion ni pa wordo skucha pa asina por trece su puntonan dilanti.
Comision di Apelacion a tuma un decision basa solamente riba e puntonan treci dilanti
dor di Sv Nacional.
Punto 4: Comision di Apelacion a tuma decision riba dos punto sin motiva con a yega na
esaki mientras e ta obliga pa hasi esaki (Motiveringsbeginsel).
Situacion 1: Pa Comision di Apelacion por a contesta e pregunta si e hungador di Sv Nacional, riba kende Sv Dakota a protesta y a haya rason den su protesta, durante di e wega di Sv Dakota y Sv Nacional ta un hungado legal of no, Comision di Apelacion mester a contesta prome kiko a base di articulo 55, inciso HR ta e consecuencianan ora un team retira for di Campeonato, den e caso aki Sv Jong Aruba. E articulo ta bisa cu tur e partidonan hunga door di e team cu a retira for di Campeonato, den e caso aki Sv Jong
Aruba, ta wordo considera No hunga! Comision di Apelacion mester a contesta e
pregunta si e carchi geel cu e hungado di Sv Nacional a ricibi durante di e wega contra
di Sv Jong Aruba, cual team a retira for di campeonato, ta cay afo of no mirando cu e
wega ey ta wordo considera No hunga. Si e no ta conta mas, e hungador di Sv Nacional
lo a hunga cu tres carchi geel contra di Sv Dakota y lo tabata un hungado no-legal pa cu
e wega ey. Comision di Apelacion a keda sin contesta e preguntanan aki. Pio ainda,
Comision di Apelacion ta bisa cu loke ta trata carchi etc. ta un otro caso, mientras e caso aki ta trata si e hungado tabata tin tres carchi geel of no durante di e wega contra di Sv Dakota. Pesey ta inexplicabel con Comision di Apelacion sin ningun tipo di motivacion ta bisa cu e hungador di Sv Nacional ta uno legal durante di e wega di Sv Dakota.
Situacion 2: Comicion di Apelacion no a motiva a base di kiko a yega na e pensamento cu AVB a crea e impresion cu 7 di e hungadornan di Sv Nacional cu no a entrega e documentonan manera prescribi den reglamentonan di AVB, a bira legal dor cu AVB a
tuma e documentonan aki (riba cual Sv Dakota a protesta). Aparte cu Comision di Apelacion ta obliga di motiva cualkier decision cu e tuma, akinan ta pisa mas pa motibo cu Sv Nacional No a Ni trece e punto aki como un punto pa nan apelacion. Comishon di Apelacion a tuma un decision riba un punto cu No tabata ni punto di apelacion di Sv Nacional.
Punto 5: Comision di Apelacion a sinta riba e stoel di AVB y di su Algemene Ledenvergadering dor di pone e responsabilidad pa cu e documentonan riba AVB y no
riba e teamnan manera semper tabata e caso. Nunca tabata obligacion di AVB pa
controla e documentonan cu un team ta entrega. Semper e tabata e obligacion di e
teamnan pa entrega documentonan cu ta na ordo conforme reglamento di AVB. Esaki semper a wordo acepta dor di e teamnan.
Comision di Apelacion no por dicidi di un dia pa otro cu desde awor e responsabilidad di esaki ta serka AVB. Desde cu AVB ta existi e responsabilidad aki ta serka e teamnan. Comision di Apelacion no por sinta den e stoel di AVB ni di e Algemene Ledenvergadering. Comision di Apelacion mester tuma un decision a base di e reglamentonan vigente di AVB. Comision di Apelacion por duna sugerencia pa trece cambionan den e reglanan, pero No por cambia esaki riba su mes. Nan No por crea reglanan nobo. Cual den e caso aki a tuma lugar. Remarkabel ta cu den casonan den pasado Comision di Apelacion a dicidi cu ora no
cumpli cu e regla di entregamento di documentonan, esaki ta trece cune cu e hungado no ta uno legal.
Punto 6: Comision di Apelacion a interpreta articulo 9 di Strafbepaling totalmente robes. Otro cu Comision di Apelacion ta pensa, e articulo aki no ta conta den e situacion cu un hungado a haya un carchi geel durante di un wega (y cu ta acumula su di tres carchi geel). Basa riba e interpretacion incorecto di Comishon di Apelacion, (di awo bay dilanti) e referee mester traha un rapport pa cada hungado cu a haya un carchi geel durante di un wega (y a acumula tres carchi geel den diferente partidonan). Aparte cu Comision di Apelacion no a tene cuenta cu referee ta anota carchi geel riba e formulario di wega di cada team (“wedstrijdformulier”), Comision di Apelacion no a tene cuenta cu un referee no por traha un rapport asina pa e simpel motibo cu e referee no ta hou bij den cua partidonan un hungado ta haya carchi geel y ki ora e ta acumula tres carchi geel den tres diferente partido. Alaves nunca esaki a wordo hasi na Aruba y tampoco na otro parti di mundo. Comision di Apelacion a dicidi algo cu no por wordo hasi y no lo wordo haci den futuro tampoco. A base di e decision incorecto aki, awo bay dilanti un hungado cu tres carchi geel por hunga normal si e referee no a traha un rapport y AVB no a informe cu e no mag di un hunga e siguiente wega.
E puntonan ariba menciona ta sigur puntonan excepcional i/o nobo pa asina Beroepscommissie dicidi pa cambia nan decision. Si esakinan no ta, kiko ta anto?
Derechonan mester wordo respeta y tur partido mester wordo trata igual. E biaha aki,
esaki lamentablemente no tabata e caso. Sv Dakota ta lamenta cu e mesun 4 miembronan di Comision di Apelacion cu a tuma e decision di cual Sv Dakota a pidi herziening ta e mesunnan cu a dicidi pa no acepta e peticion di Sv Dakota pa revisa e decision cu ta claramente contra di derechonan fundamental di un miembro di AVB pa por defende su mes den un caso. E ex-miembro di bestuur di Sv Nacional, cual na opinion di Sv Dakota no por wordo considera imparcial, a tuma parti na e decision aki tambe di Comision di Apelacion.
Sv Dakota ta lamenta tambe cu atrobe Comision di Apelacion ta tuma un decision sin
cu e ta motiva esaki debidamente. No ta bisa nada pero nada den su decision riba e
puntonan aki riba menciona cu Sv Dakota a trece dilanti como puntonan pa herzien e
decision.
Sv Dakota ta termina gradiciendo su fanaticonan y su sponsornan pa e confiansa y
apoyo duna durante e Campeonato 2016-2017. Bosonan ta The Best!
Ta desea RCA y Nacional exito den final.
DAKOTA TUR DIA!