Boluntarismo ta algo asina persuasion cu e ta invisibel. Nos ta lubida hopi lihe cu tur cos a keda crea door di pioneronan,cu tabatin preocupacion y a bira boluntarionan activo pa logra metanan grandi. –Susan J. Ellis, presidente di Energize
Fundacion Contra Violencia Relacional a nomina Suzette Kock pa e reconocimento Boluntario di Aña 2020 di CEDE Aruba.
Suzette Kock ta un di e abogadonan na oficina di Ancora Legal y mientras e ta hopi solicita y ocupa cu asuntonan di abogacia, ela sirbi den su poco oranan liber como boluntario den e funcion como President di e Directiva di e antes yama “Fundacion pa Hende Muhe den Dificultad”, e centro pa acogida y guia pa hende muhenan experenciando violencia domestico na Aruba.
Como un abogado e ta bringa semper pa derechonan humano y e ta para pa educacion pa hende muhenan na Aruba. Durante 4 añanan y pico, casi 5 aña e tabata un motor cu a traha fervientemente hunto cu e Hunta di Directiva, coordinadora y empleadonan di e fundacion pa acelera pasonan padilanti pa crea un lugar cu ta cumpli cu tur e rekesitonan riba standardnan mundial di shelternan of centronan di ayudo rond mundo. Tambe ela percura pa cuminsa cu e proceso di digitalisacion y profesionalisacion cuminsa prome cu ela retira.
E tabata consciente di e trabounan di e fundacion y asina tambe a traha hunto cu tur e team di directiva pa e cambio di nomber y branding nobo cu a bira december 2020 FCVR (Fundacion Contra Violencia Relacional)
Suzette ta hopi apasiona den su meta pa yuda hende y specialmente hende muhenan, muchanan y hende homber logra sali for di violencia y biba un bida sin violencia.
FCVR ta pensa cu ta esencial pa gradici tur voluntario pa nan compromiso na e causa y e fundacion su exito ta debi na nan. Boluntarismo por contribui semper na FCVR y e clientenan cu nos ta sirbi.
Masha danki Suzette Kock pa a duna bo tempo, experisio legal, abilidad y talento di traha pa yega metanan y realmente alcansa esakinan.Nos ta honra di por celebra bo contribucion den cual bo a cana mesun caminda hunto cu nos pa awe nos tin nos shelter nobo cual nos ta orguyoso di dje.
Masha pabien Suzette Kock cu bo reconocimento di ta nos Boluntario di Aña, nos ta expresa nos palabranan di danki di corazon pa bo compromiso sin interes cu bo tin pa nos fundacion cu ta sirbi esnan vunerable y cu mester un man contra violencia relacional.
Nos lo continua cu e trabou y nos ta aprecia tur e trabou boluntario desplega di bo persona den e añanan cu a pasa. Danki pa a yuda otronan tambe pa sigui e caminda di voluntarismo door di duna tremendo ehempel di liderazgo como voluntario y presidente di Directiva di FCVR.