Keto bay kehonan di sushi rond Aruba ta keda un topico bou di nos hende local y turista pa cual aki Sr. Lionel Croes ta splica cu Serlimar sa di esaki pero ta pueblo mester yuda.
E problema di sushi y e dumpnan ilegal ta birando mas hopi. Esaki ta a base di comportacion di nos mesun ciudadanonan, cual ta un parti cu tin atencion di Serlimar. Sr. Croes a enfatiza cu e gobierno anterior tabata cobra un cierto suma y e cobransa na Parkietenbos, ta afecta cu hende ta bay tira nan sushi unda cu ta. Pero e cobransa di Parkietenbos tabata toch un entrada pa Serlimar y a kere cu eliminando e cobransa, e lo minimalisa e cantidad di dumpnan ilegal y cu e lo tin su impacto ariba nos comunidad.
Pero e dumpnan ilegal a keda broei, paso esunnan cu tin, mester traha, bin cu diferent accion , cera caminda, pero si bay den Franse Pas y otro caminda, toch hende ta keda cu e manera di tira sushi den naturalesa, banda di cura di cas y den barionan inhabita, den naturalesa y areanan turistico.
E situacion aki tin atencion di Serlimar, hunto cu City Inspector. Pero segun Sr. Croes, ta manera di hiba awa lama, door cu e no ta yudando. Mester bin un otro forma strategico pa soluciona e problema aki y ta kere hunto cu autoridadnan competente y gobierno cu Serlimar mester sinta hunto na mesa, y conhuntamente purba yega na un solucion pa un situacion cu ta alarmante.
Lamentablemente cu autoridad no por haci hopi paso aparte cu nan man ta yen nan tin e problema cu e ley ta bisa cu ta ora garabo por tuma accion si no por hasi nada otro segun Sr. Croes.
City Inspector den pasado, a bay coba den e sushinan y a bin haya recibo di varios negoshi pa cual nan a bishita e respectivo negoshinan, a acercanan na un bon manera. Nan a cera contract cu Serlimar y esey a baha hopi.
Pero toch ta haya cierto comerciantenan cu no kier paga, y ta prefera di paga un adicto ambulante pa tira e sushi unda cu ta. E adicto ambulante ta su placa e kier pa e sigui cu su vicio. Hopi biaha e comerciante no sa, y nan a toca e tema aki cu e comerciante aki pa cual nan a mustra comprension.
Hopi biaha den naturalesa, caminda pa Young Fellow, luga bunita, unda cu turista ta frecuenta cu nan jeep, ta haya colchon, frigidaire y tur sorto di desperdicio tira eyden. No tin manera organisatorio pa haci den forma preventivo. Tur cos cu bay pa implementa den bo compania, segun Sr. Croes, ta costa placa pa haci esey. E trabaonan ta grandi, y ta keda bisa cu tur e departamentonan concerni, Cuerpo Policial, City Inspector, gobierno y Serlimar mester bin y sinta hunto pa wak con ta bay ataca e problema aki den un otro forma. Kisas lo ta ideal pa bin cu campañanan pa motiva barionan, pa tene accion di limpiesa y haya cierto recompensa di parti di Serlimar. Mester haci algo pa cuminsa conscientisa.
E adultonan ya ta dificil pa cambia nan pensamento, y lo mester enfoca ariba e hubentud, cu ta e futuro di mañan y eynan mester sigui inflitra y conscientisanan ariba e importancia di tene nos pais, Aruba, limpi. Asina Sr. Lionel Croes, vocero di Serlimar a finalisa bisando.