Despues di e awasero torencial, manera tur hende sa, hopi cas a yena cu awa. Entro otro e bario di Madiki ta un di e barionan cu mas a sufri di e problema aki. Pero segun Marlon Pietersz di Bureau
City Inspector, esaki tin su motibo. Sushi den bario a mustra di ta un problema cu hopi cas a yena cu awa den e bario particular aki.
Durante accion di limpiesa por a mira colchon, frigidaire, matanan corta ta dimes. Loke ta pasa ta cu ora cu hende tira sushedad tras di nan cura of cerca di un rooi y e awa ta lastr’e bay cun’e, e ta blokia e pasada di awa, cu e consecuencia cu e caya y casnan ta wordo inunda cu awa.
Tin basta sushedad cu a wordo recogi den cierto areanan di Madiki y Playa Pabao y a wordo treci hunto pa wordo tira afo.
Pietersz a gradici DOW, Serlimar, e ploegnan cu ta haci nan best pa tene e luga limpi, Cuerpo Policial, Salubridad Publico, Cruz Cora y tur otro instancia y NGOnan cu tambe a haci uzo di e oportunidad aki pa duna un man. Esaki ta mustra tur hende eyfo cu e cosnan aki ta pasa y por pasa. Tin cu corda cu no ta tur ora awa ta yobe manera diadomingo siman pasa, pero ora e pasa, ta pasa e ta pasa. Ta hopi awa a cay cu e consecuencianan aki. Tin cierto caminda cu por bisa cu nos por tabata miho prepara, pero asina mes, cu awa cay ta cay e ta cay.
Esaki no ta keda na un instancia pa tene e luga limpi, e ta keda na e ciudadano pa mantene rond di su luga limpi y no djis tira patras di cura y pretende cu otro hende ta bin haci limpi.
Comunidad tin cu duna di su parti. Dump ta habri, pero tin cierto hendenan no tin e facilidad pa pone e sushedad den un pickup. Si e tin un amigo por transport’e pe. Tin otro instancianan manera Serlimar, Ecotech, hendenan cu tin pickup rond cu ta dispuesto pa tira sushedad afo. Tene cuenta cu hendenan cu ta bin busca sushi na bo cas, puntra nan ken nan ta, number di telefon, pasobra nan ta piki sushi y despues bay tir’e den mondi. Y si haya sa cu ta abo a paga e persona ey, abo a zorg pa e persona bay cun’e y no yega dump, e ora abo tin chens pa haya e boet. Ta keda na nos ciudadanonan pa tene y mantene Aruba limpi. E ta un trabao di nos tur, pero cu nos tur hunto por logra esey.