Na altura di un caya cerca di Centro di Bario Playa Pabou a bin haya un mini dump caminda hopi hende ta laga tur tipo di sushi tira den e caya aki. City inspector, Sr. Marlon Pieters, ta lamenta e forma aki cu nos mes un hendenan ta haci.
E mester bira un “modus operandi” pa e pueblo mes siña cu e sushedad tin su luga, sea na dump of na bo cas. No recoge sushi na bo cas y dump e otro caminda. E ta keda un circulo vicioso, pa hopi aña, conhuntamente cu otro instancianan pa promove limpiesa pa Aruba. Aunke tin ora ta pensa, cu no ta tur hende kier compronde e mensahe. Poco poco tin hende cu sa, cu nan mester tene e luga limpi, hayando yudansa di pueblo.
E luga cerca di e Centro di Bario, ta increibel con y cuanto cos hendenan ta tira eytras. Apesar cu e ta un luga cu hopi hende ta uza, Sr. Pieters ta di opinion cu lo mester dal e caminda cera. Pero esey lo stroba hendenan cu ta biba den cercania. E ta keda na publico mes, pa sa con nan ta haci y comporta nan mes den tiramento di sushi ariba nos isla. Asina aki, no ta e miho moda pa tira sushi eytras nan.
E accion di e dos companianan cu ta duna servicio di limpiesa, lo ta bon pa nan cera cabes y organisa un accion hunto, un weekend of dos weekend, tur hende por tira nan sushi y e ora por stimula e hendenan pa no tira sushi unda cu ta. Pero semper ta haya hende cu ta acumula sushi, y nan ta prefera di bay tira unda cu ta, enbes di bay dump. Segun Sr. Pieters, no ta cuestion di no por bay dump, pero mas bien cuestion di no kier bay dump.
Ta un lastima, cu tin cierto luganan cu ta mas scondi, cu ora atardi of anochi yega, hendenan ta benta e sushi eynan y despues move di e luga, sin cu niun hende wak nada, segun Sr. Marlon Pieters, di Bureau City Inspector.