Sur Africa kier permiti pa un muhe tin mas esposo

Gobierno di Sur Africa ta studiando e posibilidad di permiti hende muhenan tin varios casa, un proposicion cu a causa un gran revuelo entre e conservadornan di e pais.

E proposicion di permiti poliandria a wordo inclui den un “green paper”, un documento gubernamental cu cualkier persona interesa por studia y riba cual por haci sugerencia, specialmente prome cu cambia un ley of crea un ley nobo di Departamento di Asuntonan Interno di Sur Africa. E intencion di e documento aki ta pa haci  matrimonio uno mas inclusivo.

Poligamia, unda cu e hombernan por casa cu varios mhe, ta legal na e pais.

Sur Africa a hereda un regimen matrimonial basa riba e tradicionnan cristian calvinista y occidental, e documento ta menciona. Y ta agrega cu e actual leynan matrimonial no ta informa pa un politica global cu ta basa den e balornan Constitucional y di e dinamica di e sociedad moderno.

E documento ta señala cu e ley actual ta permiti matrimonio di menornan y no ta permiti pa parehanan cu ta cambia di sexo y kier sigui casa sin pasa den un divorcio, cu ta algun di e defectonan.

Como parti di e impulso pa reforsa e politica matrimonial, e departamento a consulta e lidernan tradicional, como tambe e activistanan di derechonan humano y otro gruponan, riba e puntonan clave.

Activistanan na fabor

E activistanan de derechonan humano  a afirma cu igualdad ta exigi cu ta reconoce poliandria wordo reconoci legalmente como un forma di matrimonio.

E funcionarionan  a constata cu e hendenan tin opinionnan hopi diferente riba matrimonio, pero un di e proposicionnan presenta ta pa elabora un eskema matrimonial neutral pa loke ta generonan.

Sur Africa lo por caba cu e categorisacion di e matrimonionan den funcion di e raza, orientacion sexual, religion y cultura, e sugerencia ta bisa esey.

Un cara cu ta destaca y cu ta critica e proposicion ta Musu Mseleku, un strea di reality show kende tin cuatro esposa.

“Mi ta na fabor di igualdad,” Mseleku a bisa den un video publica den su propio canal di YouTube na mei. Den esaki el a afirma cu, sinembargo poliandria lo pone den duda paternidad di e yiunan.

“Mas cu esey, nos ta spiritualnan,” el a agrega. “Nos spiritonan, nos creadonan, a encarga pa nos wordo crea di e forma aki.”

“Protégé nos existencia … ta importante, tanto pa e generacion actual como pa futuro, el a skirbi den un publicacion dia 17 di mei.

Banda di defende nos cultura, tradicion y custumbernan participando den e proceso aki, ban contra poliandria rotundamente.”

E idea cu poliandria no ta autentico Africano tambe ta prevalence entre e lidernan religioso, segun Departamento di Asuntonan Interno.

E documento ta señala cu durante e combersacion cu e lidernan tradicional, a wordo manifesta cu “solamente e hombernan ta wordo permiti pa tin mas cu un casa”.

E documenta a agrega cu “como consecuencia, e lidernan tradicional ta considera cu poliandria ta un practica inaceptabel pasobra e no ta di origen Africano.”

Reverendo Kenneth Meshoe, lider di Partido Demócrata Cristiano Africano, tambe ta contra e proposicion. Den un entrevista duna na e emisora Surafricano, Meshoe a bisa cu ta berdad poligamia tabata un practica acepta, pero poliandria no.

“Hombernan ta jaloers y posesivo,” Meshoe a bisa, como splicacion pakico un matrimonio cu varios esposo lo no funciona.

 

 

Comments

comments