Diamars mainta, polis hunto cu departamento di economia a sali controla algun supermarket na San Nicolas. E departamento di economia ta controla si e supermarketnan ta mantene nan mes na e regla loke ley ta stipula riba prijsnan di canasta basico. Den esaki Today Market, Ton Li Super market y Cura Cabai supermarket a haya bishita di sorpresa y tur tres tabata cumpli manera e prijs ta stipula den e lista di Gobierno.
Poco supermarket riba nos isla ta cumpli y tin no. Pero te ainda no tin un multa pa esunnan cu no ta cumpli debi cu e departamento di economia no por controla si un supermarket ta cobrando dobbel bbo, bazv etc riba e producto. Esaki ta keda den man di Departamento di Impuesto, pero nunca a mira un team di departamento di impuesto subi caya y controla supermarket wak kende ta cobrando dobbel di belasting. Esaki ta un di e motibonan cu pueblo ta kehando hopi ultimo temponan cu productonan a bira mas caro na Aruba debi cu basta supermarket ta hinca e belasting caba riba e producto ora nan cumpre y ora bo bay page na e cash register bo ta page atrobe y esaki ta bira dobbel.
Ta spera cu yega e tempo cu belasting tambe por haya un team pa subi caya y cuminsa controla kende ta cobra belasting dimas pasobra ora cu e supermarket bay entrega su aangifte i belasting op bedrijfsomzetten, bestemmingsheffing AZV, bo no ta sigur si ta e suma ey ela gana e luna anterior y si ta cumpli.