Super Ciclon “Hagibis” ta bay dal Hapon directamente y duro

E super ciclon yama “Hagibis” tabatin e categoria aki durante mas di 60 ora, loke ta pone bira e ciclon mas duradero di e aña’ki. E ta birando den lama Pacifico cu un wowo di mas of menos 55 kilometer di hanco y cu bientonan compara cu un horcan categoria 5. “Hagibis” awor ta na caminda pa dal Hapon directamente e fin di siman aki. Ta pronostica cu e lo dal un buelta y esaki lo bai tin implicacionnan grandi pa e efectonan cu Hapon probabelmente lo bai sinti. E pronosticonan actualmente ta bisa cu e wowo di e ciclon aki ta moviendo hopi serca di Tokio sino no ta directamente riba e cuidad cu un forza igual cu un horcan categoria 2. Ta wordo pronostica cu “Hagibis” lo subi tera hopi serca di caminda e otro a haci’e den luna di September pasa. Dependiendo di e trayecto exacto y caminda e subi tera, “Hagibis” lo por pusha e olanan di lama a varios meter den e bahia di Tokio. Peor ta si e ciclon subi tera na parti oeste di e pais. Segun pronosticonan ta wordo spera mas di 250 milimeter di awacero na algun luga den centro-sur di Hapon. Mirando esaki tambe por tin interupcion di viahenan aereo of di trein den henter e pais mescos cu coriente lo por bay y laga miyones di hende den scuridad. E Copa Mundial di Rugby cu actualmente ta tumando luga na Hapon tambe lo wordo afecta y tur indicacion cu e lo bay conoce cancelacionnan debi na e awacero y biento fuerte cu e ciclon “Hagibis”.

Comments

comments