HONOLULU, Hawaii- E estado Mericano di Hawaii lo ta e prome estado pa prohibi e benta di sunscreen cu ta contene kimiconan cu ta toxico pa coralnan y bida marino.
Un amienda pa prohibi e benta di sunscreen cu ta contene dos tipo di kimiconan toxico pa lama a wordo acepta den parlamento di Hawaii diamars ultimo. Awo ta en espera pa e wordo firma pe gobernador. Si e ley aki wordo firma, e prohibicion lo drenta na vigor na 2021.
Oxybenzone y octinoxate ta destruyendo oceanonan rond mundo, segun cientificonan cu di acuerdo cu nan investigacion a mustra cu e kimico ta kibra e coral door di filtra e nutrientenan di e koraal y ta stroba e desaroyo di pisca y bida marino, manera zeeegels y zeewier.
Casi 14 mil ton di lotion di e sunscreen ta bay den e rifnan di coral rond mundo cada aña, segun un estudio publica na 2015 den e Archivonan di Contaminacion y Toxicologia Ambiental. E concentracion mas halto di sunscreen a wordo haya pa prome biaha ariba beachnan yena cu turista, manera ta e caso hopi biaha na Hawaii y Virgin Islands Mericano.
Na Hawaii, un estudio conduci aña pasa pa e NGO Haereticus Environmental Laboratory na e spot iconico pa snorkel, Hanauma Bay a haya cu un average di e 2600 bishitantenan diario a laga mas o menos 412 liber di sunscreen den lama. E efectonan dañino aki di sunscreen por tuma luga den concentracionnan abao manera 62 particula di un triyon, cual ta ekivalente na un druppel di oxybenzone den seis piscina Olimpico.
Estudionan haci a revela cu e contaminacion di e oceano ta bin di tanto hendenan uzando sunscreen como tambe e cantidad di awa residual cu ta wordo manda pa lama.
“Mas y mas hende ta realisa cu, ora cu bo bay cas y dal un baño, e awa ta wordo manda toch pa lama”, según Senador di estado di Hawaii, Laura Thielen. “Dus e ta dañando nos coralnan toch, no ta importa si bo ta uza sunscreen riba tera of na lama”.
Oxybenzone y octinoxate ta wordo haya den casi tur sunscreen, incluyendo den marcanan popular manera Hawaiian Tropic, Banana Boat, y Coppertone, como tambe algun locion facial.
Toch, hopi di e sunscreennan alternativo ta wordo bendi. Algun di nan ta for di e marcanan ya menciona, cu ta uza ingredientenan manera titanium di oxide pa proteccion di cuero. Tambe, proteccion solar den pañanan cu UPF (Factor di Proteccion Ultravioleta) similar na SPF ta wordo fabrica dor di Patagonia, Coolibar di Australia, REI, Lilly Pulitzer, Athleta, y otronan.