Vakantie ta den cuminsa y un bes mas San Nicolas ta cla pa e “Summer Edition” di Experience San Nicolas cu ta tuma luga riba diadomingo 9 di Juli 2017. Esaki ta e di shete edicion di Experience San Nicolas (ESN). E biaha aki cu un seccion nobo.
Experience San Nicolas ta lansa e seccion di arte expresivo durante e “Summer Edition” aki.
Un di e prome artistanan cu ta bay presenta su mes na cas den e seccion aki ta e hoben talentoso Leonardo Philips. Leonardo ta un contribuyente conoci den mundo di poesia aki na Aruba y a lanta na San Nicolas. E lo bay guia un seccion di poesia cu yama ‘Express from Within’. Durante e tayer aki e lo siñabo e principio basico di con pa skirbi poesia cu un perspectiva diferente y tambe con pa observa y conoce mas di bo persona. Alabes e hoben aki lo deleita tur presente cu su expresion poetico cu poemanan di su mesun coleccion.
Durante su seccion e ta duna atencion na pais Aruba y un focus ariba nos ciudad San Nicolas. Leonardo kier invita interesadonan, edad di 18 pa 35 aña, pa bin participa cu e seccion cu e ta ofrece gratis. Leonardo ta cla pa comparti cu e participantenan tur locual el a siña den transcurso di e ultimo añanan. Pa reserva bo cupo, please manda un email na [email protected]. Asina aki por confirma cu bo lugar ta sigura.
Henter e team di Experience San Nicolas ta invita Aruba completo pa bin p’riba y conoce nos artista aki y colabora cu nos cultura y herencia cultural. Ta solamente hunto nos por logra esaki. Keda pendiente pa e siguiente articulo unda nos ta bay elabora ariba nos otro pop up di arte expresivo pa e “Summer Edition” aki.