“Tuma e decision pa haya un yiu ta temporario. Educa, lanta y guia un yiu, ta un decision di bida! Esey ta loke ami ta kere aden, na momento cu mi haci e pregunta di kico kiermen: Ta un Mama”, Parlamentario Sue-Ann Ras a cuminsa na expresa.
Celebracion di Dia di Mama no kiermen djis un dia cu comercio a dicidi pa celebra y pone hopi hende sinti e presion di ‘consenti’ e mamanan materialmente. E dia aki mester ta un reflexion mundial, tocante unda nos ta para y unda nos kier bay como mama.
Maternidad ta cubri cada area di bida di un hende muher. E ta cambia e forma cu bo ta pensa di bo mes, bo famia, bo amistadnan y e mundo en general. E ta cambia e forma con bo ta wak bida, e forma con bo ta refleha y e forma con bo ta actua y reacciona. E ta siña bo pa examina e cosnan, cu nunca antes bo a pensa mes riba dje, incluso prome cu haci of bisa algo y maternidad ta siña bo, pa cuestiona e cosnan cu semper bo a pensa, cu tabata corecto y berdad.
Maternidad ta un paseo bunita, un paseo salvahe y na mesun momento e biahe di mas increibel cu bo lo por tuma. Cuminsando for di e momento cu bo a haya sa, cu bo ta na estado, te dia cu abo como mama su mision caba riba e mundo aki.
“Ami tabata sa cu mi bida lo cambia drasticamente, pero asina mes, mi no tabatin idea di kico ta spera mi. No tin formula pa ta un mama perfecto, pero si tin e formula pa ta un mama unico pa bo yiunan. Siña conoce bo yiunan, pa abo por acomoda bo funcion como mama, paso cada etapa y cada yiu, ta exigi pa nos tin otro rol. Como mama di 3 yiu, bo ta pensa cu ya bo a lanta 2 yiu, pues 1 mas no lo haci diferencia. Wel mi tabata robes, paso mi tin cu lanta e yiu aki, pa otro tempo, cu otro reto, pensamento y formacion, pero aplicando e linea cora di norma, balor y principio di ser humano como su fundeshi principal”, Ras ta elabora.
Como mama, nos ta multifuncional y nos tin cu siña sobrebibi maternidad sin perhudica niun hende. Nos rol ta di sumo importancia y ora cu un yiu haci algo cu no ta corecto, en bes di sacudi cabes, grita, zundra of straf, nos mester puntra nos mes: “Kico ami a haci malo, pa lanta e mucha aki, cu e actitud of accion ey?”
Anto reflexiona riba esey…analisa y cambia strategia y dialoga pa bo sa tambe kico a pasa, specialmente si ta prome biaha. Cu nos bida como mama ta exigente, esey no tin duda. Cu nos no tin suficiente tempo, tambe ta un realidad. Pero nos no por lubida nunca e decision cu nos a tuma, na momento cu nos a haya sa cu nos ta sperando un yiu. Cu e decision ey di haya un yiu, no ta algo temporario, sino pa bida. “Finalmente mi kier gradici mi mama y tur mi tantanan cu a hunga un rol importante den mi bida y a demostra mi kico kiermen ta un mama unico. Tambe mi kier desea di curason, tur e mamanan y esunnan cu ta haci e funcion di mama den nan trabou y/of bida diario, un FELIZ DIA DI MAMA y cu Dios sigui drama su bendicion riba cada un di boso y cu Spirito Santo ilumina boso den e funcion di mas importante riba mundo: Ta Un Mama!”, Ras a finalisa bisando.