Sue-Ann Ras (MEP): “Playground di Pos Chikito a haya un mihor uzo awo”

Un di e preocupacionnan grandi cu varios ciudadano tabatin y a vocifera riba diferente media, tabata e 3 playgroundnan na Pos Chikito. Parlamentario Sue-Ann Ras tambe tabata sumamente preocupa cu e decision di e gobierno anterior tocante esaki y cada biaha cu e pasa riba e caminda ey, tabata puntra su mes con por tabata posibel cu un minister di infrastructura y un gobierno completo, a permiti pone playground riba un caminda principal.

MOCION 2017
Parlamento di MEP, mediante un mocion di colega Hendrik Tevreden, a pidi Minister Otmar Oduber na december 2017, pa kita e ‘playgrounds’ for di e caminda principal na Pos Chikito. E mocion aki a pasa y mesora Ras a cuminsa e proceso di haci peticion, pa haya un playground pa e muchanan di klas 1-2-3 di Scol Basico Sagrado Curason na Savaneta. ‘Pa hopi aña e scol aki tabata anhela un playground pa e muchanan. Fondo no tabatin pa yega na esaki y sigur nos muchanan mester diberti y hunga durante nan pauze. Ta di aplaudi cu e docentenan tabata creativo pa hopi aña y a brinda e muchanan diferente material pa hunga durante nan pauze,” Ras a indica.

PETICION LOGRA
Despues di un procedura largo, pero cu persistencia, siman pasa diahuebs e playground na scol basico di Savaneta a keda realisa. “Mi kier gradici Minister Otmar Oduber como tambe DOW pa e tremendo sosten y trabou pa realisa e proyecto aki. E muchanan ta hopi contento y sigur lo disfruta plenamente di e playground aki y asina por ta mas activo durante nan pauzenan,” Ras a finalisa bisando.

Comments

comments