Papiamento ta bay cumpli su 15 aña, como un idioma oficial di Aruba. For di 21 di mei 2003, cu a pas’e den parlamento como nos idioma oficial, banda di e idioma oficial Hulandes.
Papiamento ta mas cu un medio di comunicacion. E ta un refleho di un vision di henter un pueblo y di tur esunnan cu ta papi’e, entre otro: anos como Arubiano cu ta papia Papiamento na Aruba. E ta duna un balor tambe na tur esunnan cu ta domin’e y ta forma parti di e identidad tambe di nos propio hendenan, di nos cultura, di nos historia y ken nos ta representa como Aruba.
Papiamento ta un lenga. Un lenga ta esencial pa progreso continuo y bienestar di un pais completo, di full e sociedad. E ta sobrevivencia di un ser humano. Via nos lenga nos por comunica y nos por haci hopi mas cos den bida.
Papiamento ta e lenga materno di un gran parti di nos poblacion. Ora un mucha cuminsa papia, su prome expresion, su prome pensamento ta den su lenga materno. P’esey mes UNESCO, na 1999 a proclama tur 21 di februari, iniciando for di aña 2000, como Dia Internacional di Lenga Materno, unda cu ta promove diversificacion linguistico, cultural y tambe multilingualismo.