BUENOS AIRES, Argentina- Militarnan Argentino a confirma cu a localisa e restonan di e submarino ARA San Juan, cual a disparce dia 15 di november 2017 cu 44 persona a bordo.
“Ministerio di Defensa y Armada Argentina ta informa cu e compania Ocean Infinity, mediante observacion realisa cu’n ROV (Remote Observation Vehicle) na 800 m di profundidad, a logra identifica postiivamente e submarino ARA San Juan”, segun e comunicado oficial.
Prome cu a confirma e noticia, autoridadnan a comunica cu e famia di e tripulantenan.
Deteccion inespera
Dia 15 di november a cumpli un aña desde cu e submarino a disparce. Ademas, tabata e prome dia di e break di tres luna cu e compania Mericano Ocean Infinity, contrata pa gobierno Argentino pa realisa e buskeda, lo a bay tuma.
A declara un periodo di recess te cu februari di otro aña, pa e barco Seabed Constructor por a haci un mantenimento. Seabed Constructor ta e unico barco ainda encarga pa busca e ARA San Juan.
Sin embargo, e compania a cumisa cu e operacion di buskeda un dia despues. El a dirigi su mes pa un punto di interes nobo, despues di e deteccion di un obheto di 60 m na 800 di profundidad.
E indicio a wordo cataloga di Categoria C, ekivalente na un “probabilidad fuerte” di cu lo por ta e nave submarino. E noticia a reanima e famianan, cu a biaha den calidad di observadonan di e mision.
Diabierna anochi, e barco Seabed Constructor a yega na e sitio unda e obheto a wordo detecta. Varios hora despues, a confirma cu ta trata di e submarino cu a disparce.