Frances Rodriguez ta un studiante di Universidad di Aruba y hunto cu algun studiante mas di Universidad, ta trahando riba un proyecto cu a wordo asigna pa un modulo di proyecto social. Ta trahando cu Imelda Kleuterschool pa recauda fondo pa asina nan por cumpra material didactico pa e muchananan.
E ta sigui splica cu esaki ta un tarea pa e modulo di proyecto social, pa Universidad mes a haya e opdracht pa haya esaki y ta un oportunidad como grupo pa desaroya actitudnan cu caracter humanitario y ta bon pa nan futuro como profesional.
Den e caso aki un studiante colega tabata sa di e situacion y a dicidi e ora pa yuda nan y tambe ta un bunita labor pa e muchanan. Rodriguez a sigui splica cu lo bay tin un evento dia 11 di December. E lo ta for di 5’or y mey di atardi pa 8’or y mey di anochi. Ta bay tin dino jump, Grupo di Gaita Katatumbo, un show cu e muchanan mes a prepara. Lo bay tin un galeria di arte y tambe un feria multi cultura cu cuminda for di varios parti di nos region. E lo ta un anochi cu henter famia por disfruta.
E evento aki lo tuma luga na Centro di Bario Playa Pabao.
Robin Lake tambe ta un studiante y lo participa den e proyecto aki. Un di e coleganan di Lake, Larissa Maduro, tin un yiu cu ta bay e scol y e ta na altura di e situacion di e scol. E ta conta cu mester di un fondo di mas of menos 10 mil florin pa e materialnan cu e scol ta desea. Esaki lo bay recauda cu e evento aki, Lake a bisa. Si un hende kier haci su donacion, e ta posibel. E idea ta pa recauda fondo cu e evento. Sinembargo si mas hende kier aporta cu un donacion, esey ta mas cu bon bini.
Un yamada ta bay pa e mayornan cu tin mucha cu ta bay Imelda Kleuterschool, pa aporta na e evento aki.