Studiantenan di Sostenibilidad den Emprendimento Internacional na Universidad di Aruba a tene un presentacion pa e compania local Aruba Ocean Villas cu a duna nan e oportunidad di haci e investigacion na nan Resort como proyecto final di nan estudio.
Como tal, nan a duna e resultadonan final di e projecto na Sra. Osyth Henriquez, gerente y propietario di Aruba Ocean Villas. Den e raport final nan a presenta nan resultadonan y algun sugerencia practico cu e hotel por aplica den nan maneho diario basa ariba methodo di investigacionnan proba y conceptonan sostenibel y inovativo.
Sra. Henriquez a bisa: “Nan tabata busca un lugar na unda nan por haci nan research ariba sostenibilidad y inovacion. Esaki a cay net bon pa nan y nan a kies pa traha un estudio riba e material di nos bungalownan. Nos na nos turno ta bai hinca e research aki den nos propio research grandi di sostenibilidad.”
Manera ta conoci Aruba Ocean Villas ta un boutique hotel cu a bin cu un concepto hopi natural y ta traha cu e conceptonan di reciclahe y bek na materialnan basico pa brinda nan clientenan un tranquilidad unico den un ambiente unico, artistico, creativo y relahante bek na naturalesa.
E studiantenan di Universidad di Aruba a haya guia di Sr. Kirby Barrera durante nan proyecto estudiantil.
Riba e potret: Osyth Henriquez di Aruba Ocean Villa’s, Sr. Kirby Barrera, e studiantenan internacional Jasmijn & Frank hunto cu e studiante di Aruba Jaython.