Dia 18 di October ta Dia Nacional Contra Traficacion di Hende y esey a tuma over di Europa. Merca tin otro fecha, pero door cu ta conecta cu Hulanda, nan tambe ta celebra esaki. Aki na Aruba, Sra. mr. Jeannette Richardson- Baars ta Coordinador Nacional Contra di Traficacion di Hende (Counter Trafficking Taskforce Aruba).
Pa full un siman ta bezig ta dunando training na hotel, na mundo di transporte y na KPA. Diaranson a toca turno na muchanan den examenklas di HAVO/VWO di Colegio Arubano. Esaki ta pa motibo cu ora cu nan caba nan scol, nan por bay Hulanda, Merca of Canada pa bay studia. Eynan nan ta riab nan mes. Nan ta perde e sistema di apoyo di famia. Nan ta yega na un punto unda nan ta sinti nan mes nan so y ta busca amistad cu otro hende. E ora nan ta core risico cu un traficante ta acerca nan y haci como si ta nan amigo. E por ta un hende cu ta papia papiamento mes cu ta sinti su mes na cas y ta bira amigo di cas. Ta bira sistema di loverboy, garanan den nan grip y hinca nan den mundo di prostitucion.
Durante e training pa e studiantenan di examenklas di Colegio Aruba, Sra. mr. Jeannette Richardson- Baars tabata t’ey presente hunto cu Sra. Shamir McKenzie, directora di Salvation Army. Shamir mes tabata victima di traficacion di hende, tempo cu e tabata studiante pa busca e parti financiero pa cubri gastonan di scol, el a cay den grip di un traficante.
E charla/training aki ta pa studiantenan ta ariba alerta, kisas den un situacion cu tur cos ta mustra bon, cual por resulta cu ta echt asina. Pero meta ta pa e studiante haci tur lo posibel, pa e no cay den un situacion asina, segun Sra. mr. Jeannette Richardson- Baars, Coordinador Nacional Contra di Traficacion di Hende (Counter Trafficking Taskforce Aruba).