Diadomingo awo studiantenan di EPI procedente di St. Maarten, kende nan famia ta pasando den temponan duro lo tene nan prome di dos carwash. Meta di e carwash lo ta pa recauda fondo pa sigura nan estadia na Aruba. E studiantenan ta ricibi un studielening, pero ademas di esey, nan mayornan tambe ta manda placa pa nan tur luna, pa asina cumpli cu nan debernan. Despues di e pasada di horcan Irma, e mayornan actualmente no por mantene nan yiunan financieramente.
Consehero di estudio di St. Maarten na Aruba, Giselle -Mireille Sint Jago, a yuda nan organisa y promove e fundraising y actualmente ta purbando di haya un part time job pa e studiantenan. “Nos ta pidi e comunidad di Aruba pa saca un man yuda e studiantenan aki, pa asina nan por sigui cu nan estudionan exitosamente na Aruba, sin retraso cu lo por wordo causa door di problemanan financiero”.
E prome carwash lo wordo teni dia 24 di September, for di 9 or di mainta te cu 9 or di anochi. E luga lo ta na e carwash banda di Driftwood Restaurant. Ban apoya Eridania, Idrissa, Johanna, Jahrmael y Meshach, e 5 studiantenan di St. Maarten cu ta organisando e dos carwashnan aki pa asina recauda fondo. Bo por contribui door di cumpra un ticket pa carwash pa solamente 25 florin. Nan lo laba bo auto y haci esaki limpi, tanto paden como pafo. E studiantenan y nan amistadnan di Aruba ta gradici e pueblo di antemano.
E siguiente carwash lo ta dia 1 di October, for di 9 or di mainta pa 9 or di anochi, na ‘Care Car Wash’ Schoolstraat Playa, banda di Driftwood Restaurant. Pa cualke informacion por tuma contacto cu Meshach 5612691 of Idrissa 5642197