Siman pasa, riba e dianan 26 y 27 di October di 2016 The Amsterdam Manor Beach Resort a ricibi e studiantenan di EPB Hato y San Nicolas, pa asina haya un rond leiding y orientacion tocante e diferente departamento den e propiedad.
Esaki ta un iniciativa di e gerencia di e hotel cu ta tumando lugar anualmente pa varios aña caba y unda cu e obhetivo principal ta pa laga e studiantenan aprecia e industria turistico; e diferente ramonan di studio cu ta contribui na e operación di un hotel, y asina stimula nan interes pa nan tambe por forma parti di e crecemento di Turismo di Aruba.
Riba diaranson 26 di October, 16 studiante di EPB San Nicolas huntu cu nan mentornan: Ch. Croes y A. Daly, y diahuebs 27 di October tabata e turno di EPB Hato, cu e guia di nan mentor S. Wever. The Amsterdam Manor Beach Resort ta un hotel cu ta contribui constantemente cu e sector di educacion di Aruba, y ta kere fielmente cu ora nos inverti den educacion, nos no mester enfoca unicamente riba recursonan economico, sino tambe den e recursonan social (capital humano).
Esaki ta duna e studiantenan e oportunidad di por wak di cerca con un hotel ta opera y nan por haya un miho bista di e industria, pa asina eventualmente ora cu nan mester tuma decisionan di ki rumbo nan kier bay den bida, nan por haci esaki cu un base solido y bon informa di kico e industria di turismo ta ofrece nan. Como muestra di esaki, nan tin e ehempel di a tuma den labor e aña aki, un stagiaire di EPI cu a wordo ofreci un contract ora el’a caba cu su studio.