Un biaha mas mayor y studiantenan a haya e oportunidad di haya un anochi informativo di scolnan di afo. E biaha aki studiantenan a haya informacion di Coastal Carolina University (CCU) for di Associate Provost for Global Initiatives, dr. Darla Domke-Damonte, kende a splica mas di e scol pero tambe kico ta e programanan cu e universidad tin di ofrece. Esnan cu tabata presente a haya e anochi aki interesante y te hasta a cuminsa pensa di cambia richting di nan estudio y ta mirando pa bay CCU.
Representante di CCU tabata contento di a ricibi e oportunidad pa papia cu famia y studiantenan potencial riba e oportunidad pa atende na Coastal Carolina University. Nan tin un enfoke fuerte riba compromiso experimental y cu e acuerdo di estado esaki ta haci cu e scol aki ta pagabel pa studiantenan y nan famia pa tin un experiencia grandioso unda cu no solamente nan por studia loke cu nan kier, pero tambe duna un compromiso y sigura nan cu esey ta e direccion cu nan kier bay. CCU su localidad ta na e Grand Strand cerca di Myrtle Beach na South Carolina. Nan ta haya 18 miyon di turista y ta manera Aruba, Darla Domke-Damonte a remarca. Nan ta custumbra pa haya bishita y nan tin un area cu por sostene hopi actividad y studiantenan gusta esey pero tambe e universidad tin un enfoke grandi riba studiamento. Studiantenan ta siña loke ta teoria y practica, por ehempel e reglanan di accounting. Pero tambe nan ta haya e oportunidad di procesa actividadnan di accounting. E studiantenan cu ta bay den ciencia marino, ta un di e programanan mas grandi, ta haci investigacion riba boto pero ta bay riba awa den e area. Asina aki nan por yuda tuma decision cu por yuda avansa ciencia. Nan tin programanan di bachelor como tambe PHD, specialmente den ciencia marino.
“Nos ta spera pe proximo añanan nos ta akinan constantemente y nos ta spera di topa cu famianan y studiantenan. Aworaki nos tin 10 studiante di Aruba y nan ta contento cu nan programa. Nan ta bon den comparti cu nan miembronan di comunidad. Nos ta mirando dilanti pa hendenan tuma contact cu nos y nos a priminti di tuma contact bek cu nan pa yuda nan cu e programanan”, Darla Domke-Damonte a remarca.
Rebecca Spellen ta studiante di Colegio Aruba y a haya cu e anochi informativo aki tabata uno hopi interesante. “Ami ta pensando si mi ta bay Canada of Merca. Tur anochi informativo cu tin, mi ta bin pa mira cua mi ta haya mas interesante, cua ta manera fit mas pa mi y asina”, Rebecca Spellen a remarca. El a bay anochi informativo di Canada tambe y e ta sinti cu esun di CCU a fit e mas. E universidad aki tin cosnan hopi interesante di cual por ta e scol aki lo ta su opcion pa bay pa asina sigui studia.
Jimmy Cabrera studiante di EPI di Ciencia y Tecnologia den Bouwkunde ta haya cu e anochi informativo tabata basta interesante mirando tur e areglonan cu gobierno di Aruba ta haciendo cu institutonan na Canada, Hulanda. “Mas interesante mi a haya over di e prestamo. Mi tabata hopi interesa pasobra mi a mirando diferente universidad cu mi lo kier bay, igual na Canada y Merca”, Jimmy Cabrera a remarca. E ta haya cu e ta un oportunidad pa studiantenan di Aruba cu kier bay sigui studia afo. Oportunidadnan cu studiantenan por tuma bentaha di dje pa loke gobierno ta haciendo pa nan. E anochi aki tabata uno basta interesante pa Jimmy Cabrera, unda cu el a haya hopi informacion y a keda contento di loke e universidad tin di ofrece studiantenan di Aruba.
Na e momentonan aki Jimmy Cabrera ta studiando ingenieria aki na Aruba, pero por ta e lo kier bay cambia di richting ainda y no ta sa precies kico. Aunke cu e ta mirando pa un ingeniero di kimico lo pas pe, pero e tin di mira precies cua ta e richting cu kier bay den dje.