TECNOLOGIA
NEW YORK, Merca- Un studiante di New York a presenta un demanda contra di Apple Inc. pa 1 biyon dollar. E ta alega cu e software di reconocimento facial di e compania lo ta vincula pa eror cu’n serie di robo di e tiendanan di Apple.
Ousmane Bah, di 18 aña di edad, a bisa cu el a wordo aresta den su casa di New York na november, acusa di a horta den un tienda di Apple. E orden di aresto tabata inclui un potret cu no ta parce Bah, a bisa den un demanda presenta dialuna. Un di e robonan, na Boston, a tuma luga na juni, e dia cu el a asisti na su fiesta di graduacion na Manhattan, el a señala.
Bah a declara cu anteriormente a pidi un rijbewijs sin potret, cu e ladron mes por a haya of horta y uza como identificacion den e tiendanan di Apple. Como consecuencia, segun Bah, su nomber por a wordo asocia, di manera eroneo, cu e cara di e ladron den e sistema di reconocimento facial di Apple, cu e ta bisa cu ta wordo uza den e tiendanan di Apple pa haci siguimento di e personanan sospecha di a horta.
“Mi mester a responde na varios acusacion falso cu a resulta den un stress severo y den dificultadnan”, Bah a bisa den e demanda.
Apple y Security Industry Specialists Inc., un compania di siguridad tambe acusa den e demanda, no kier a duna opinion ariba e asunto.