BHOPAL, Inda- Un studiante di 19 aña, di e ciudad Indio di Bhopal, a wordo viola pa oranan largo. Durante e violacion e hombernan tabata tuma tur nan tempo pa bebe un te y huma un sigario, pa despues sigui cu e hecho reprochabel aki.
Pero loke ta mas sorprendente ta loke a sosode despues, según Times of India. E mucha muhe a bay na tres warda di polis, pero el a wordo cori for di eynan. Na e ultimo warda di polis, el a wordo bisa cu su storia ta “poco creibel”. Un detaye increibel: ambos mayor ta traha na un warda di polis, pero nan tampoco a haya oido.
Solamente ora cu e dama hunto cu su mayornan a logra di gara dos di e abusadornan y entrega nan na polis, nan declaracion a wordo tuma. Den nan declaracion ta para tambe cu e abusadornan a horta e mucha muhe su renchi orea, su telefon y su holoshi.
E violacion a tuma luga den oranan di trempan riba un luga druk, na 100 m leu di e station hopi concura Habibganj. Habitantenan di e ciudad di den shock, ya cu Bhopal ta pa e hende muhe na India, un di ciudadnan mas safe na India.
Mama di e hoben viola ta desconcerta pa e falta di cooperacion di polis: “E ta un di e episodionan mas horibel den mi bida. Si p’ami, cu ta polis, ta pasa asina tanto problema pa entrega un keho di violacion den grupo di mi yiu muhe, kico lo e ta pa e ciudadano comun?”
Fuente: https://www.msn.com