Ultimo dos simannan por a mira un cambio den e ambiente na Aruba. Na cierto areanan, principalmente bahando for di un area na halto, por mira na horizonte cu e visibilidad no ta limpi.
Despues di e erupcion di e volcan na Sint Vincent, hopi hende a pensa cu e shinishi di e volcan lo a yega den e area di Aruba. Pero esaki probablemente lo no ta e caso. Segun por a compronde for di expertonan, e shinishi di e volcan ta pasa hopi panort di Aruba na un altura di 20 mil pia. Si por tin shinishi di e volcan mes presente aki na Aruba, e ta asina fini cu e ta dificil pa detecta.
Banda di e presencia di stof di Sahara, e biento duro cu tin frecuentemente e dianan aki ta causa hopi ola. E biento fuerte ta trece mas salpeter riba e Aruba. E combinacion di e dos fenomenonan aki ta afecta e visibilidad. E bientonan cu sa experencia ta entre 30 y 40 km pa ora. Y e visibilidad ta baha te na 15. Siman pasa hasta e visibilidad a baha te na 8 km.
Ta calcula cu ta sigui spera e mesun ambiente den e dianan aki, cu ta su temporada, esta e parti prome cu temporada di horcan cuminsa (dia prome di juni).
Conseho Meteo
Den su informe diario, Meteo a bisa mas aleu cu por bisa cu stof fini di Sahara lo stroba visibilidad y baha e calidad di aire un poco durante proximo dianan. Personanan cu alergia y problemanan respiratorio mester tene esaki na cuenta.