Comision di Festival di Buki pa Mucha di Biblioteca Nacional Aruba ta hopi contento cu e apoyo cu e festival ta haya. Tanto di libreria como di scolnan participante. Tur aña maesto y maestra ta prepara nan klas pa bishita di un autor, contador di storia of un ilustrador. E aña aki atrobe e festival tin tur potencial pa bira un fiesta di buki grandi y un experencia unico pa nos muchanan di Aruba.
Biblioteca ta invita autor di buki local y di otro pais y isla pa duna presentacion na mucha pa asina stimula nan interes pa e mundo di buki, storia y imahen. Tambe biblioteca ta invita contador di storia, ilustrador, musico, coro di mucha y gruponan teatral pa duna contenido na un Siman di Buki pa Mucha. E festival ta habri cu un presentacion di tur autor y ilustrador combina cu un presentacion di muchanan di scol y un mercado di buki pa mucha. E aña aki a toca turno na Scol Basico Prinses Amalia pa prepara un presentacion durante apertura. Tur esaki ta tuma lugar diabierna atardi patras di biblioteca na Playa. Sigui pa un siman di bishita na 60 scol basico, primario y special.
Biblioteca ta presenta e autornan di buki pa mucha di Aruba, Mariebelle Arends, Liliana Braamskamp-Erasmus, Richard Dabian, Irmgard Frans, Dolfi Kock y sra. Belen Kock-Marchena, Rudyomar Leysner (ilustrador di e Regalo di Siman di Buki 2016), Vanessa Paulina, Sergio Tjie-A-Loi y Gino Vrolijk.
Comision di Festival di Buki ta hopi contento di por conta cu un grupo di profesional y creativo pa entusiasma mucha pa lesa buki. Ta spera cu e bishitanan na scol lo duna muchanan mas smaak pa lesa, scucha storia y aprecia imahen y dibuho den buki y/of interesanan pa e profesion di autor of ilustrador.
Biblioteca ta ofrece diferente actividad pa mucha otro siman den cuadro di su Festival di Buki pa Mucha. Muchanan por topa cu autor entre 3or y 4or di dialuna pa diahuebs. Lo tin contamento di storia, musica, canto y baile.
Na biblioteca na Playa lo tin presentacion di Roland Colastica (dialuna), Jeroen Hoogerwerf y Liliana Braamskamp-Erasmus (Diamars), Mylo Freeman (Diaranson) y Indra Hu y Sandra Purperhart (Diahuebs).
Na Sta. Teresita Center, San Nicolas tambe tin presentacionnan special di 3or pa 4or. Mylo Freeman (Dialuna), Leo Regals (Diamars), Monica Clarinda (Diaranson), Roland Colastica (Diahuebs). Tur mucha ta bon bini. Presentacionnan ta completamente gratis. Por bay biblioteca cu Oma cu Opa pa asina haci e atradi mas special.