Recientemente Stichting Sportsubsidie Aruba tene un reunion informativo pa tur federacion deportivo na Aruba. Topico principal tabata e Reglamento di Subsidio pa e aña 2019. Mester bisa den un sala completamente yen, e diferente representante nan principal di e 40 federacion nan presente a dialoga hunto cu e bestuur di SSA y e comision tecnico riba e topico menciona.
Director di Stichting Sportsubsidie Aruba, Sr. Tito de Cuba a splica ampliamente riba e puntonan importante cu mester a wordo atendi cu e federacionnan deportivo pa loke ta e reglamento di subsidio pa e proximo aña. A elabora riba temanan manera finanzas, condicionnan general pa pidi subsidio y tratamento di e diferente peticionnan, gastonan subsidiabel, entrenador di seleccion y por ultimo e galardon Premio Excelencia den Deporte cu tabata bou encargo di e presidente Sr. Gerald Franca.
E reunion a bay den bon ambiente unda di parti federacionnan deportivo hopi pregunta a ser haci na e bestuur di SSA como tambe na representantenan di e Comision Tecnico. Riba varios di e articulonan cu a ser treci padilanti a dialoga pa yega na un mihor entendimiento den un proximo ocasion. Awor e federacionan deportivo lo mester bay bek den nan seno y traha riba e punto y articulonan menciona.
Stichting Sportsubsidie Aruba ta spera cu awor tin un claridad pa loke ta e Reglamento pa e Subsidio 2019.