Dia 20 april 2018 Stichting Rancho ta cumpli ocho aña di a wordo funda. Manera cu tur hende sa, stichting Rancho a keda funda despues di e exitoso exposicion temporario cu Museo Arkeologico a habri su portanan cun’e na aña 2009 den Schelpstraat. Nos kier gradici e team completo di Museo y tur persona y e profesionalnan cu a traha hopi duro pa pone tur e informacion di historia di Rancho den e expo aki. Tambe nos kier gradici e minister di Cultura cu e tempo ey a pone hopi enfasis y fondo riba e apertura di Museo Arkeologico na 2009. Nos ta e baby cu oficialmente a nace for di Museo Arkeologico y awe nos ta cumpli 8 aña. Asina nos por conta hopi cos, di kico tur e Stichting Rancho a logra te cu awe utilisando e lema di Conservando Historia y Cultura di Rancho.
Stichting Rancho ta un Fundacion sin animo di lucro, pues un NGO manera cu ta wordo yama den e terminologia huridico. Ta asina cu desde cu e Stichting Rancho a wordo funda e no a ricibi un subsidio for di Gobierno. P’esey nos ta yama danki na tur e sponsornan y sigur na CEDE Aruba cu pa e ultimo añanan a sa di duna nan aporte na Stichting Rancho, cu awe nos por yega y gosa di e 8 aña nan aki exitosamente, pasobra awe Rancho ta wordo mira cu un otro pensamento, un pensamento mas positivo. Teniendo na cuenta su Herencia Cultural Historico bibo cu e tin.
Riba nos website www.stichtingrancho.org y nos Facebook page di Stichting Rancho tur hende por aprecia e cantidad di actividad y trabounan cu a wordo ehecuta y cu ainda falta pa ehecuta den futuro. Asina nos por wak e proyecto principal conservando e Boto Miniatura Crioyo y e Rancho den Transformacion, caminda cu e limpiesa di e hanchinan ta algo cu sigur ta resalta. Tambe e arte riba muraya y asina por sigui. Sin laga afo e experencia educativo cu e “Rancho Walking Tour” a trece pa nos comunidad nacional y internacional.
Stichting Rancho mester di BO, pa asina por sigui traha na bienestar di e bario y su hendenan. P’esey nos ta busca y sigui busca Boluntario cu ta desea di por ta parti di e desaroyo aki. Nos mester di hopi hende pa duna un man den diferente manera, sea ta den directiva of den cualkier otro comision pa yuda den un of mas actividad y proyecto andando y of cu tin cu cuminsa ainda. Nos kier traha mas cerca cu e scolnan aki na Aruba den tur nivel, tambe internacional. Tambe nos kier sigui crece den e trabou en conhunto cu DCA, UNESCO, UNDP, SDG’s, SIDS y mucho mas. Sin laga afo tur nos otro partnernan cu nos tin como Stichting Monumentenfonds, Dutch Caribbean Heritage Platform, Aruba Sailing Association, Biblioteca Nacional y mucho mas.
Pa futuro Stichting Rancho ta drenta den e area comercial, mirando cu mester crea fondo pa cubri gastonan operacional di e stichting. Pa e motibo ey nos a crea diferente manera con pa haci esaki. Nos tin material educativo pa duna tayer na diferente scolnan y departamentonan. Tambe nos a crea e experencia educativo cu ta e “Rancho Walking Tour” cual tour lo bay wordo duna no solamente na nos localnan, pero tambe na nos bishitante turista. Mirando cu e turista y nos localnan ta buscando mas informacion di nos historia y cultura autentico di Aruba y Rancho tin tur esaki pa ofrece.