Stichting Rancho recientemente tabata tin un Town Hall Meeting pa asina hende por yega hunto na auditorio di museo archeologico y discuti algun tema. Stichting Rancho ta luchando pa basta tempo caba pa conserva y preserva locual ta e bario Rancho pero lamentablemente ta keda wak procesonan cu ta anda cu ta keda stroba esaki.
Den e caso aki specificamente e proyecto di Harberhouse cual ta uno masha bunita mes segun sr. Rosa, pero un proyecto tambe cu ta complicando acceso di e piscado pa e yega na su waf. Den tur e discusionnan a yega na otro cu e piscado mester tin acceso na su waf pa eherce su trabao di pesca, pero tambe e cumprado di pisca pa no perde accesso.
A papia tambe riba e parti di Shoenhaven y Markthallen durante e Town Hall Meeting pasobra tin intencion tambe den cambionan di direccion di trafico, dus ta proposicionnan cu tin, y e Town Hall Meeting aki netamente ta pa debati esakinan pa saca afo kico comunidad lo desea.
“Nos sa cu comunidad kier conserva su parti historico. Nan kier por sigui tin accesso na e area aki, pero nos sa cu tin desaroyonan cu ta complica acceso di nos como piscado of comunidad pa e teritorio aki”, segun sr. Rosa.
Na e area unda ta desaroyando e proyecto nobo, e beach ta liber pero e acceso ta mustra cu tin un teritorio di e parkeerplaats y caminda publico. “Berdad nos ta bisa nos mester embeyecemento, nos a bay di acuerdo, pero e acceso ta locual ta keda un problema aworaki”, sr. Rosa ta bisa.
Piscadonan y otro organisacionnan cu tin di haber cu conservacion di Aruba su herencia, fundacion nobo Stichting Beheer Centrum Oranjestad, tur a bini hunto cu Stichting Rancho durante e Town Hall Meeting aki pa discuti varios punto. Esaki no ta solamente un lucha pa un punto cardinal pa nos parti historico, pero e ta algo general pa Oranjestad y Aruba completo, segun Stichting Rancho.
Stichting Rancho a manda carta pa gobierno caba riba esaki y te ainda un ministerio so a duna oido, ta wardando riba e otronan pa tambe compronde kico ta e lucha. “Tin hopi rapport traha caba, pero den e caso aki nos kier un bon cooperacion cu Aruba Ports Authority y su mandatarionan, y tambe pa nos por yega na un solucion. Zowel pa markthallen cu ta cay bao Santa Rosa. Tin diferente cosnan pa tene cuenta cu ne, y tambe pa locual ta e limpiesa y desaroyo nobo economico aki”, segun sr. Rosa
1 aña den deliberacion
Mas o menos caba 1 aña tin ta delibera cu e inversionista di e proyecto aki, a discuti e parti cu tin cu keda pa e piscadonan y tambe e parti di comunidad. “E ultimo lunanan nos a ripara cu esey no ta haya oido, mirando desaroyo tumando luga cu DIP y DOW hinca den esaki tambe, pero ultimo nos a bay di acuerdo riba embeyecemento, pero nos kier aclaria con esaki tin cu tuma luga”, sr. Rosa ta bisa.
Esnan cu ta bende articulo den markthallen tambe tin un inkietud, nan no sa kico ta bay sosode, cosnan ta bini di un dia pa otro y Stichting Rancho ta purba di ta envolvi den dje. Como fundacion Rancho nan tin tur e teritorio aki pa conserva lo maximo cu ta posibel di nos herencia, monumentonan y sitionan historico, y esaki pa e parti di piscamento y bendedo di piscanan, e punto cardinal aki ta sumamente importante pa conserva segun sr. Rosa.