Clifford Rosa, presidente di Stichting Rancho ta splica cu algun luna pasa, nan a yega na ministerio di Infrastructura na unda a palabra cu Land Aruba lo yama reunion pa tur hende sinta hunto pa finalisa e tematica di desaroyonan tumando luga na Waf’I Rancho. “Esaki ta un tematica tumando luga pa basta tempo caba, y mi ta bisa cada biaha cu bin bek na mesa parce cu no ta bin un adelanto,” segun sr. Rosa.
Stichting Rancho a wordo yama pa duna cuenta na ministerio di infrastructura, despues keda warda atrobe pasobra nada a sosode den nan banda, anto e ora ey ta fastioso ora scucha por ehempel DOW duna su descripcion cu APA y desaroyadornan mester sinta hunto cu Stichting Rancho y piscadornan pa bini na un bon acuerdo.
“Si ta berdad, nos tin cu sinta hunto na mesa, pero fundacion Rancho a pidi reunion pa tur hende sinta na mesa pa termina e mal comprendemento. Pasobra si ta bisa cu tabata tin problema di comunicacion, si, comunicacion ta e area cu ta trece hopi problema pero awor nos ta pidiendo pa trece e comunicacion cu mester paso ta hopi tempo nos tin cu sigui cu e desaroyo pa conserva e area aki pa nos generacionnan cu ta bini,” segun sr. Rosa.
Loke ta sosodiendo na e beach awo dilanti Waf’I Rancho, bo por bisa e ta cultura di e inversionista, y mester accepta nan cultura di por ehempel duna saco grandi di maishi na e palomanan cu ta eynan: “bo ta atendiendo cu naturalesa, cu full un sistema cu ta casi imposibel cu cada biaha bo tin cu adapta na e inversionista, anto ki dia nos ta wak e inversionista ta adapta su mes na nos?,” segun sr. Rosa ta expresa.
Ta spera di por yega na un entendimento cu e inversionista, APA y cualkier otro instancia di gobierno pa tur cos cana debidamente bon pa tur partido, mirando cu den e caso aki a laga Stichting Rancho afo totalmente riba decisionnan cu a wordo tuma cu nan no ta na altura di dje.