E fiesta di Cunucu 2016 na un cas di cunucu, den un ambiente cultural total tabata e momento ideal pa presenta e buki Het aanpassen van Cunucuhuizen aan de wensen van vandaag.
E buki a keda skirbi pa studiantenan Coen van der Spek y Fabian Heil despues cu nan a haci nan afstudeer opdracht na Stichting Monumentenfonds Aruba. E studiantenan su prome contacto cu Aruba tabata durante un Minor organisa den e area di Rancho y despues nan a bolbe pa nan opdracht caminda cu nan a studia e calidad tecnico di e casnan di cunucu y tambe con manteniendo e calidad tecnico y monumental toch por adapta e casnan aki na e tempo actual.
E buki ta un guia y un manera pa stimula doñonan di casnan di cunucu pa mantene esakinan como parti importante tambe di nos pasado y cultura.
Durante e presentacion a haci entrega di e buki na representante di Ministerio di Cultura, Sra. Indra Zaandam y tambe Representante di AIB Bank, Representante di Monumentenbureau y tambe boluntarionan cu a traha hunto na e proyecto aki.
Pa por a logra haci e buki aki realidad Stichting Monumentenfonds a conta cu boluntarionan , Andrew Rasmijn, Josephine Lacle, Ebby Ruiz y Marielle Hoeijmakers pa duna forma na e contenido di e buki. Pa medio di esaki SMFA kier gradicinan pa e trabou mescos cu tambe un danki na Monumentenbureau y Plantage Hoop en Zorg pa nan contribucion.
Tambe un danki special na AIB BANK cu a kere den e proyecto aki y a contribui na e realisacion di e buki.
Pa tur e personana interesa den e buki lo por download esaki gratuitamente via e website di Stichting Monumentenfonds Aruba www.monumentenfondsaruba.com
Stichting Monumentenfonds ta kere cu ta importante pa preserva nos pasado pa futuro y banda di proyectonan di restauracion ta hasi esaki tambe pa medio di proyectonan manera nos fiesta di cunucu y e buki aki cual ta hiba e comunidad tambe mas cerca di nos monumentonan.