Awe e fundacion End Child Abuse a haci entrega di un carta na tanto Gobernador Alfonso Boekhoudt como na Parlamento cu un peticion urgent. Nan ta pidi pa tur Parlamentario y Minister pasa den tres diferente tipo di screening. Di e forma aki ta cumpli cu e maneho di Integridad cu politiconan ta papia di dje.
Mijenou Tromp y Edwin Willems tabata e dos personanan cu a acudi na oficina di Gobernadornan den oranan di mainta. E fundacion ta sinti cu a haci hopi promesa na nan pero no a cumpli cu nada.
Por corda cu e fundacion aña a organisa un demostracion masal pa mustra nan mal contento pa e forma con e sistema ta funciona aki na Aruba. “E dia ey nos a haya hopi promesa, pero tur ta falso. Sociaal Crisis Plan a gasta 36 miyon florin. Pero e no a trece niun beneficio pa e muchanan. No tin ni un Kinder Ombudsman pa casonan cu bay den doofpot,” Willems a expresa di e forma aki nan disgusto pa e pasividad den solucion pa abuso contra muchanan.
Nan tin nan mesun pensamentonan riba pakico di e tardansa den bini cu solucionnan. “Tin biaha e procesonan ta wordo stroba dor di hendenan cu posicion halto den Gobierno pa motibo cu nan ta meti den e casonan aki of pa tapa pa otronan. P’esey nos a dicidi di entrega un carta na Gobernador pa pidi un debido screening di politiconan,” tabata palabranan fuerte expresa door di Willems.
Loke nan ta pidi den e tema delicado aki ta transparencia, integridad y solucionnan. A pesar di promesanan haci, a pesar di Sociaal Crisis Plan, te ainda Voogdij tin lista largo di clientenan. “Na final nada no a wordo haci.”
E carta cu nan a entrega ta papia di e motibonan cu nan a yega pa e tuma e paso aki y e tipo di screening cu nan ta pidi. Den e carta ta papia di e lucha pa derecho di mucha. A mustra situacion cu por a mira den ultimo añanan unda Minister, Parlamentario of Coordinadonan na diferente ministerio a haya nan mes den Corte pa acusacion di abuso sexual di mucha / menor di edad. “Tin Politico cu den pasado a traha yiu cu muchanan menor di edad y nunca a wordo denuncia ya cu e mayornan a acepta of sconde e caso. Awendia e ta miembro di Parlamento manera nada no a pasa,” Mijenou Tromp a lesa e parti aki cu ta para den e carta pa Gobernador. Nan ta haya cu Parlamentario ta un funcion importante, e ta un representante di pueblo y ta masha importante pa nan ta integro, confiabel y tin un nivel di moralidad halto pa e funcionnan aki.
“Si kier cambia leynan pa duna miho sentencia na abusadonan y miho ayudo na victimanan, mester elimina e posibilidad cu abusadonan por drenta Gobierno y podera di posicionnan importante y di poder,” Tromp a bisa.
E fundacion ta haya tambe cu si Gobierno acepta algo asina, e ta manda un señal hopi negativo pa muchanan y henter e pais. “No por acepta esaki como un forma nobo di biba.”
Pa e motibonan ariba menciona y door cu ta den un proceso electoral aworaki, ta haya cu ta e momento pa tur minister y parlamentario pasa den un proceso di screening cu ta consisti di tres parti y di e forma aki por cuminsa papia di integridad. “Nos ta urgi Gobernador pa haci tur lo posibel pa para actonan di abuso sexual cu menornan.”