Stichting BOB Aruba kier a gradici tur nos participantenan di e Full Moon Walk cu a tuma lugar den Parke Nacional Arikok dia 15 di juni den oranan di anochi. E caminata aki tabata den claridad di e luna yen.
Stichting BOB Aruba a motiva comunidad pa pasa un tempo agradabel den famia y na mes momento disfrutando di e naturalesa cu Aruba ta brinda nos. Nos por bisa cu e caminata tabata sumamente exitoso y ta pidi pa un ripiticion.
Stichting BOB Aruba hunto cu CIBC FirstCaribbean a organisa e caminata aki. Uni den e mesun metanan:
Conscientisa e comunidad di e importancia di participa na e programa di screening di pecho cada 2 aña cerca Stichting BOB Aruba. E screeningsprograma aki ta yuda detecta iregularidadnan den pecho mas tempran posibel. Un mammogram na tempo por salba bo bida.
Na mes momento organisando e caminata aki pa recauda fondo. Fondonan cu ta sumamente necesario pa Stichting BOB Aruba keda traha riba e mantenemento di e mashinan pa esakinan keda optimal, asina nos por sigi duna e miho servicio posibel na e hende muhenan di Aruba entre 45 aña cu 75 aña di edad
Stichting BOB Aruba ta hopi contento cu e cooperacion hunto cu CIBC FirstCaribbean y Parke Arikok y sigur nos ta sumamente contento con tur e participantenan a cuida nos medio ambiente manera a wordo enfatisa durante henter e temporada di promocion.
Den luna di october lo tin un otro caminata cu tambe ta forma parti di e “Walk for the Cure” awareness program. Stichting BOB Aruba ta invita pueblo completo pa participa cu e caminata aki.
Pa keda informa tocante nos actividadnan please sigi nos riba nos Facebookpage: Stichting BOB Aruba. Pa mas informacion tocante nos projectonan, evenementonan y servicionan por tambe yama number di tel 588 1212.