Den e ultimo luna di e aña aki, Stichting BOB Aruba ta tin e oportunidad pa forma parti di e evenemento di Winter Wonderland cu a tuma lugar na Renaissance Market Place. E evenemento aki a brinda hopi goso na e pueblo di Aruba cu a acudi y na mes momento a forma un oportunidad pa por duna un aporte via e pago di entrada na 2 fundacion importante pa prevencion di cancer di pecho.
Manera ta conoci, durante di 2 siman largo, grandi y chikito den un ambiente unico por a goza den diferente forma na Winter Wonderland. Stichting BOB Aruba y Mary Joan foundation a tuma e oportunidad di percura pa instala e “iceskating ring”cual na mes momento a surgi como otro manera pa recauda fondo. Compra di cada entrada pa e “iceskating” durante e dianan aki ta destina pa bay pa Stichting BOB Aruba y Mary Joan Foundation.
Un gradicimento ta bai pa tur e grupo, boluntarionan y e companianan cu a sponsor, pa nan ayudo y aporte durante henter e aña 2019. Mas cu claro un danki special na e comunidad di Aruba cu a acudi hunto cu famia pa pasa tempo hunto y alabes a aporta na e bon causa aki.
Cada oportunidad y actividad cu a hasi durante e aña di 2019 a enfoca pa yuda conscientisa e comunidad di e importancia pa participa na e programa di screening di pecho cada 2 aña via Stichting BOB Aruba. E meta di e programa di screen pecho ta pa detecta iregularidadnan na tempo, pa asina tuma tratamento mas pronto posibel y cu ta menos invasivo. Un mamogram na tempo por salba un bida!
Den e aña di 2019 Stichting BOB Aruba a brinda informacion na diferente Ferianan di Salud, charlanan, shownan y segmentonan na television y ademas e dos caminatanan organisa hunto cu CIBC First Caribbean bank. Stichting BOB Aruba ta gradici prensa, tur organización y instancianan cu a hasi tur e actividadnan posibel den transcurso di aña 2019.
Tur Fondonan cu a ricibi ta sumamente necesario pa Stichting BOB Aruba por continua cu: e trabou di controla e salud di pecho di nos hende muhernan di Aruba, entre 45 y 75 aña di edad, e mihor servicio posibel y pa e mantencion optimal di e machine nan.
Pa aña 2020 Stichting BOB Aruba lo tin hopi actividadnan planea pa sigui conscientisa tur hende cu deteccion tempran durante chekeo di pecho regular, ta e unico manera preventivo pa combati problemanan cu cancer di pecho. Nos ta spera di sigui conta riba e ayudo y aporte di nos pueblo di Aruba.
Pa keda informa tocante e actividadnan di Stichting BOB Aruba por sigui nan Facebook Page Stichting BOB Aruba. Pa mas informacion tocante di projectonan, evenementonan y servicionan por yama telefon 588 1212.
Nos ta desea henter pueblo di Aruba Feliz Pasco y un Prospero Aña 2020.
Stichting BOB Aruba
Adres: Frankrijkstraat #1
Tel: 5881212