Ariba 12 di oktober 2012, esta 5 aña pasa, Stichting Bevolkingsonderzoek borstkanker Aruba a wordo funda door di un grupo di expertonan preocupa pa e situacion di e malesa di cancer na pecho. Demasiado hende muhe tabata yega demasiado laat cerca dokternan y mester a pasa den tratamentonan duro y largo y hasta a perde e bataya contra e malesa aki.
Hunto cu Hulanda y tambe Corsou, cu ya tabata haci un sondeo di poblacion pa cancer na pecho, a traha ariba e posibilidad pa cuminsa na Aruba tambe cu esaki. Ariba 12 di october 2012 a lanta e fundacion cu meta pa detecta na tempo iregularidad den e pecho di hende muher sano entre 45 pa 75 aña di edad, cu por mustra riba cancer na pecho. Y asina aumenta e chens pa biba mas largo cu cancer na pecho door di tratamento cu ta menos agresivo y menos intensivo.
Despues di mas cu 3 aña di trabaonan unda a logra recauda fondo pa ubica e fundacion su sede, cumpra tur material necesario y mas importante yega na palabracionnan concreto cu AZV, e sondeo por a cuminsa na maart 2016 cu su trabaonan.
Na un manera structura a invita 24 mil hende muhe di 45 pa 75 aña pa bin haci nan mammogram na St. BOB Aruba cu ta situa den e edificio di IBISA na Frankrijkstraat 1.
E programa structura pa controla pa medio di un mammogram ta duna su fruto y ya casi un 40% di hende muhenan cu a wordo yama a bini.
St. BOB ta masha agradecido na tur cu a yuda y ta yudando e fundacion y ta mustra bon cla cu e trabaonan ta di hopi balor pa e comunidad di Aruba. Na e directiva cu a sinta 5 aña largo y a traha incansabel pa logra e metanan, AZV, IBISA, boluntarionan y tur cu a yuda di cualkier forma, danki.
Tambe un danki na tur cu financieramente a y ta yuda y ta kere den e proyecto aki.
En especial na st. BOB su empleadonan cu ta pusha e trabaonan tur dia y ta duna lo miho di nan parti. Boso ta hopi valioso.
Directiva nobo:
Na mes un momento nos kier a participa cu entrante October 2017, st. BOB Aruba tin un directiva nobo. Esaki ta consisti di : Sra. Juliette van Romondt – Voorzitter, Sra. Sharina Gumbs-vice voorzitter, Sra. Bojoura Richards-Secretaris, sra. Edita Ramos – 2nd Secretaris, Sra. Rose Ann Anthony – tesorero, sra. Suyan Sneek – 2nd tesorero y Sra. Vanessa Winterdal miembro di directiva.
Masha masha danki na e miembronan di directiva saliente y hopi exito na e directiva nobo cu tambe ta cla cu hopi motivacion y entusiasmo pa e retonan nan dilanti.
Pabien St. BOB Aruba.
Detecta cancer di pecho na tempo por scapa bida.
Pa mas informacion por yama tel, 5881212 of pasa na oficina na Frankrijkstraat 1, edificio di IBISA.