Ariba 12 di oktober 2012 fundacion Borstkanker Onderzoek BOB Aruba a ser funda door di un grupo di personanan preocupa y cu sigur hopi amor pa nan trabao y empeño pa detecta cancer na pecho tempran.
Stichting BOB Aruba durante e 6 aña aki a traha duro y a logra tambe hopi. Awor despues di 6 aña a yama mas cu 24 mil hende muher den e edad di 45 pa 75 aña pa bin haci nan mammogram pa asina por detecta cancer na pecho tempran. Detecta e malesa aki tempran sigur ta yuda baha e mortalidad, no mester muri mas di cancer na pecho y tambe baha e tratamentonan asina pisa cu ta sigui ora detecta laat.
Hopi hende muher ainda no ta yega pa haci nan test di pecho. Sea nan tin miedo di e comprencion cu ta diferente pa cada hende, sea pa e rayo x cu e machin ta duna ( cu ta hopi mas abao cu tur rond di nos) of sea cu nan tin miedo di tende un resultado malo. Kiko ta mas malo cu ta laat y tin cu pasa den tur e dolornan cu ta sigui dor di tratemento pisa asina un patient di cancer na pecho a bisa.
Na aña 2016 despues di a prepara tur e facilidad y oficinanan den e edificio di IBISA na Frankrijkstraat 1 a cuminsa cu 5 persona y a cuminsa yama tur hende muher di e edad di 45 pa 75 aña. Despues di dos aña nos por tabata basta satisfecho cu a atende casi 40% di esnan cu a wordo yama y awor den e di dos yamada e cantidad ta subi y nos ta spera di logra ricibi 50% of mas di esnan yama.
Tambe nos lo kier a presenta nos manager nobo cu ta sr. Davy Aparoe cu lo reemplasa sra. Enrita Werleman pa cu e maneho di e oficina aki.
Nos ta desea sr. Aparoe tur clase di exito y nos tin sigur cu lo e sigui guia e fundacion den bon caminda y tambe cu tur e retonan nobo dilanti.
Pabien Stichting BOB Aruba. Bo a bin pa keda.
Pa cualkier pregunta por yama di dialuna te cu diarbierna di 8 -4.30 na telefoon 5881212
Ariba e potret team BOB Aruba cu sr. Aparoe para dilanti.