Rotaract Club of Aruba hunto cu Stichting Bloedbank Aruba ta invita pueblo di Aruba Diadomingo awor 19 di November pa pasa na nan booth durante e “EndPolioNow 5KM Fun Walk and Run”.
E “EndPolioNow 5KM Fun Walk and Run” ta wordo organisa pa Rotary Club of Aruba hunto cu su partners Rotaract Club of Aruba, Interact Club of Aruba y tambe Xavier University School of Medicine. Check-in lo tuma lugar pa 4.30 pm y e caminata lo cuminsa pa 5:00 pm saliendo for di Fisherman’s Hut direccion Lighthouse y bolbe bek.
Durante e caminata, Rotaract Club of Aruba hunto cu Stichting Bloedbank Aruba lo duna diferente informacion na personanan cu ta desea di bira un donante di sanger y por inscribi nan mes pa asina inicia e proceso pa por bira un donante di sanger pa contribui na yuda y salba un of mas persona cu tin necesidad di sanger.
Desde September ultimo, Rotaract Club of Aruba y Stichting Bloedbank Aruba a bishita varios compania-, organisacion- y instancianan pa comparti cu nan via un presentacion, e importancia di ta un donante di sanger na Aruba y con un persona por yuda salba un bida.
Cu e proyecto “You’re somebody’s type: give a little, save a life!”, Rotaract Club of Aruba kier a conscientisa y educa e comunidad di Aruba, e importancia di ta un donante di sanger y tambe e proceso con pa bira un donante di sanger.
Si bo persona, compania of organizacion ta desea di forma parti di e proyecto “You’re somebody’s type: give a little, save a life!, por fabor tuma contacto libremente cu Rotaract Club of Aruba na [email protected], via nos pagina di Facebook of Instagram. Tambe por acerca un miembro di Rotaract Club of Aruba pa mas informacion con pa bira un donante di sanger pa cu e proyecto aki.
Duna un regalo di bida, bira un donante di sanger!