Stephen Hillenburg, creador di ‘Sponge Bob’, a fayece

Stephen Hillenburg, creador di e popular serie di comiquita ‘Sponge Bob’ a fayece diamars na edad di 57 aña. Hillenburg tabata tin varios aña ta lucha contra di sclerosis lateral amiotrofica. Aña pasa,Hillenburg a revela cu el a wordo diagnostica cu e malesa neurodegenerativo aki.
E morto a wordo confirma door di Nickelodeon, e canal original di e serie. “Nos tin e tristo deber di anuncia e fayecimento di e Stephen Hillenburg, creador di ‘Sponge Bob, e cadena di television a skirbi ariba su cuenta di Twitter.

Ademas, den un comunicado, cita pa Deadline Hollywood, Nickelodeon a destaca cu Hillenburg “tabata un amigo hopi stima y socio creativo desde hopi tempo caba pa nos tur aki na e canal”. “Steve a crea ‘Sponge Bob’ cu’n sentido di humor unico y e inocencia cu a trece alegria na generacionnan di mucha y famianan rond mundo”, el a agrega.

Segun NBC News, Hillenburg tabata profesor di Biologia Marino, y esaki den combinacion cu su talento artistico y su pasion pa lama, a hib’e na crea e serie aki, popular rond mundo.

E noticia di e fayecimento di Hillenburg a inunda e red. Hopi internauta no a tarda na expresa na tristesa pa e hecho aki y a recorda cu nan tabata gusta wak ‘Sponge Bob’ tempo cu nan tabata mucha.

Comments

comments