Pa Diego de Cuba, presidente di STA, e sindicato ta tuma retiro di e Comision ProSiguridad pa motibo cu no por haci loke mester haci pa loke ta e tema di criminalidad.
E marcha a tuma luga dia 13 di October. A bay ariba papia cu e ministernan. Tin cosnan cu a wordo palabra y tin un documento cu a wordo firma. Lamentablemente tin cu bisa un biaha mas tin falta di cumplimento di parti di e Gobierno aki y e biaha aki ta bay directo riba prome minister, Mike Eman, cu con por ta posibel cu ta firma un documento asina y ta gewoon tuma hende haci y no ta cumpli cu loke a firma.
STA a bisa e comision cu e sindicato tin por lo menos 8 pa 9 contracto colectivo pa termina cu nan ainda prome cu e aña caba. Tin contractonan colectivo cu companianan fastioso manera ASAP, La Cabana, Aruparking tambe den baliña. Tin cu caba di renoba esun di New India. Asina aki por sigui menciona. Tin Unicon tambe. E sindicalista por menciona mas compania cu ta bezig cu nan. No ta husto cu ta bay dedica tempo valioso na un causa cu de Cuba ta haya uno hopi noble, pasobra Aruba no por sigui den direccion di e criminalidad cu ta bayendo. Den media el a lesa cu tabata tin un otro atraco. Necesidad ta haci cu e personanan aki comete atraco y tin hopi echado di baina tambe, hopi hende sinberguensa cu ta haci esaki. Di un otro banda ta cu tin hopi ilegal tambe y e cantidad di cuerpo policial no ta duna tampoco. Awor aki nan ta haciendo milager. Nan no ta superman ni superwoman. Ni 10 ni 20 miyon no ta yega pa soluciona e problemanan cu nos tin riba nos isla. E aanpak riba e problema di criminalidad mester bay coy un otro angulo. Tin di bay wak e problemanan social cu ta e rais di e problema di criminalidad. E problemanan social cu tin riba nos pais awor aki ta asina grandi cu e departamento social no por maneha e situacion, segun de Cuba.