STA ta di opinion cu: Gobierno mester reactiva CAS y controlnan estricto

Fundacion CAS (protector di consumidornan) tin tur derecho di existencia pa sindicato STA. Pero si e no haya e subsidio debido door di Gobierno pa funciona, e lo keda stanca. Esaki ta loke cu presidente di STA Diego de Cuba avisa den un declaracion.

STA y De Cuba ta boga pa reactiva fundacion CAS pero pa e haya e subsidio necesario pa haci trabou na bienestar di e consumidornan.  Actualmente tin un canasta basico cierto cantidad di productonan, cual ta e uniconan cu ta wordo controla. De Cuba a bisa cu mirando e situacion na Aruba, mester tin control riba tur producto, pasobra e comercio liber ta causa e variacion grandi di prijs. Pero ningun ciudadano tin e chens awo di core rond y wak unda tin e miho prijsnan. Mester tin un standarisacion di prijsnan riba tur producto y un control pisa. Awo ta e consumidor ta esun cu ta sinti e golpi constantemente.

E situacion actual ta cu si tin aumento di utilidad, ta e consumidor tin cu bay paga pa esaki cu aumento di prijsnan. P’esey e control mester bira mas severo.

E mensahe pa e proximo gobierno ta cu mester bini cu e controlnan y implementa e leynan manera debe ser. Awo tin leynan cu contenido tremendo, pero no ta ehecuta esaki. “E ta bira unley morto. Nos a ripara pa hopi tempo caba cu e situacion t’asina. E ta desastroso pa e consumidor cu tin un entrada limita y ta cosnan cu por cambia,” De Cuba a bisa.

E presidente di STA ta hopi positivo cu crecemento economico, mirando cu turismo a bin ta aumentando y e generacion di placa lo ta miho. Pero mester bini cu otro companianan pa diversifica e economia y evita e problema cu a pasa aden cada biaha cu turismo haya un golpi. E ta contento cu e maneho sublime cu tabatin pa cu COVID y ta conseha pa sigui cuida curpa pasobra ainda no tin e virus aki completamente domina.

 

Comments

comments