Directiva di “SINDICATO DI TRAHADORNAN DI ARUBA”(STA), kier a informa tur e empleadonan di “ALHAMBRA CASINO” cu gerencia di dicho compania a solicita un referendum via oficina di Mediador di Gobierno pretendiendo cu awor aki sindicato STA no tin e mayoria mas di e empleadonan como miembro den e compania aki locual cu STA ta considera un falta di respet grandi pa cu e sindicato pero principalmente un falta di respet superior pa cu e empleadonan di “ALHAMBRA CASINO”.
Tur hende sa con un campaña sushi a wordo hiba di parti di gerencia di ALHAMBRA y un par di nan “compinchinan” pa intimida trahado pa bandona e sindicato pa asina ey nan por “wheel & deal” y cana pasa trapa tur hende manera nan kier. Apesar di esaki STA a keda mantene e mayoria y pa medio di e comunicado aki kier a haci un apelecion na un y tur cu ainda no ta afilia na e sindicato pa haci esaki di inmediato segun su consenshi.
Negociacion nan pa cu e CAO ta andando y ta na mita di caminda caba. Locual ta un estorbo ta cu e Sra. Susan no ta biba na Aruba y esey ta pone cu cada bes tin tardansa y cada bes ta tira e culpa ariba e sindicato. Tambe tur hende por observa e intimidacion nan di e Mericano cu ta maneha e casino. Pa nos logra nos meta nos mester ta uni.
Cu sindicato mes ta dificil corda sin sindicato. Gerencia no kier presencia di un sindicato cu ta bring’e. Pesey e comunicado aki pa nos ban UNI FORSA mas cu nunca pa evita cu mester bin un otro referendum.
Esaki ta conta pa tur departamento di CASINO DI ALHAMBRA.