Sindicato STA a tene reunion cu empleadonan di Elmar pa informa nan riba e situacion di e fondo di pension cu ta resorta bou di nan.
Presidente di STA, sr. Diego de Cuba, ta splica cu nan a haya un presentacion di e presidente di e comision di pension, caminda e ultimo a splica locual ta e situacion di e fondo di pension. E empleadonan a wordo informa tocante e situacion y kico ta bay ta e futuro pa cu e fondo di pension di Elmar. Pa locual a ser presenta, a bin conclui cu tabatin un maneha fatal pa e personanan responsabel di e tempo ey cu no a dirigi e fondo manera debe ser, pa cual motibo e fondo tin un tiki problema. E presidente di e comision di pension a conseha e Sindicato pa considera e posibilidad pa join un otro fondo di pension. Actualmente dos fondo di pension cu ta posiblemente e Sindicato por join cu nan ta APFA y VERF.
Segun sr. De Cuba, tres aña pasa a subi e Prima di 18 porciento pa 21 porciento. E consecuencia, segun e presidente di STA, ta cu e Primanan lo sigui subi y e empleadonan lo sali perdi, cual e empleadonan no lo permiti pa sosode. Despues di temporada di vakantie lo haci presentacionnan pa e empleadonan. Esakinan lo ta di APFA, VERF y e presidente di comision di pension mes pa comparti tur locual nan a splica STA caba.
Tambe a papia cu e empleadonan tocante loke a sosode cu dos empleadonan di Elmar, cual sr. De Cuba ta considera un inhusticia di parti di director di Elmar. E ta lamenta con por a busca un ekipo forensico di exterior pa haci un investigacion riba e empleadonan, mientras tin Recherche na Aruba pa casonan asina. E presidente di STA ta sinti cu e decision pa trece e ekipo forensico ta uno descabeya y placa tira afo inecesariamente. E ta sinti cu ta inaceptabel pa tene un empleado den interogacion pa 12 ora largo. Tambe a mustra cu e empleadonan en cuestion tin derecho pa tin un abogado of un representante di Sindicato na nan banda.
Sr. De Cuba ta cuestiona e forma di maneho di director di Elmar pa cu su propio empleadonan, mayoria cu tin mas di tres aña caba den servicio di e compania. E ta puntra si e compania no tin Recurso Humano pa encarga cu casonan asina. Ademas, e ta mustra cu tin hopi inhusticia cu STA sa y cu Directiva di Elmar pronto lo haya sa.