STA recientemente tabata tin un reunion cu minister di Husticia, mr. Andin Bikker, hunto cu Shopstewardnan di Warda Nos Costa y di IASA. Sr. Diego de Cuba, lider di sindicato STA ta amplia.
Ta un secreto publico cu Warda Nos Costa a wordo neglisha malamente pa gobierno anterior, y ta di lamenta, ya cu e ta un departamento crucial pa locual ta trata combatimento di ilegalidad, di hendenan cu ta ariba nos isla di forma ilegal. Ta di bisa cu STA a clarifica hopi di e asuntonan aki cu minister. Minister Andin Bikker ta un persona cu ta traha dedica y focus ariba asuntonan cu mester wordo resolvi. Pa loke ta high priority, e ta bay atende esakinan di biaha. A papia over di e promocionnan na IASA cu ta pega y tambe esunnan cu ta pega den e Cuerpo di Warda Nos Costa. Asuntonan cu tin di wordo atendi cun’e, ekiponan necesario pa Warda Nos Costa por funciona debidamente. A elabora extensamente ariba problemanan di IASA y Warda Nos Costa. Dia 22 di Februari proximo, lo tin un otro reunion.
Lo bay tin un reunion entre KPA y Warda Nos Costa, pa sondea e posibilidadnan pa Warda Nos Costa cay directamente bou di KPA, aunke tin e posibilidad tambe cu e por bira un Cuerpo ariba su mes, Mescos tin IASA, pero den e caso aki, ta varios gobierno a bin y varios a bay, pero e no a wordo formalisa ainda y e no por keda asina, e mester wordo formalisa.
Ta hopi ta e problemanan cu a ser treci dilanti, tambe tin un malcontento bastante formal pa locual ta trata esunnan cu ta dirigi e cuerponan aki y esaki ta loke STA por a compronde for di e trahadonan y e delegadonan. Y esaki a wordo bisa na e minister, mester bin cambionan radical pa loke ta maneho di e cuerponan aki, ya cu si algo ta bay malo den e departamento y esun cu ta dirigi e departamento, e ta responsabel pa esaki. Na final di cuenta, ta e minister ta esun cu ta carga e responsabilidad, pero p’esey tin e Hoofd Van Dienst, cu ta keda responsabel directamente.
SI mester bisa cu nan a experiencia bastante cambio den e ultimo añanan, pa locual ta trata e “happy flow” cu nan a introduci na aeropuerto. Y esaki tabata un negoshi bastante caro, cu nan a haya nan obliga di tuma, segun por a compronde for di e hendenan cu ta traha cu e makinarianan aki. E mesun hendenan cu ta atende cu turistanan cu ta drenta y sali, e no ta funciona 100% y tin cosnan cu ta pasa cu nan ta puntra nan mes, si mester sigui cu e aparatura nan aki. Aruba lamentablemente, hopi biaha ta bira e proefkonijn di cierto sistemanan, cu despues ta lamenta di esaki. Y e cosnan aki no mester sosode, pa complace ningun hende, pa complace ningun compinchi. Awo gobierno tin di bay studia e sistema cu ta wordo practica na Aruba. E ta yuda den cierto sentido pero si e ta “waterdicht” ta keda e pregunta.
Esaki ta cosnan, segun Sr. de Cuba, cu mester bay investiga profundamente, tambe ta pa yuda combati ilegalidad di e pais aki y tambe pa por “profileer” un persona, pa haci esaki e persona mester ta para bo dilanti. Ningun delincuente no ta drenta Aruba, cu “delincuente” skirbi ariba su frenta. Un turista ta bin y ta bisa e ta keda na un hotel grandi, pero nunca e no a yega e hotel. Den e formulario cu e turista ta yena, e ESTA, nan ta yen’e pero ken e persona ta y kico e ta bin haci, den e profilering por saca afo mas miho, cu e aparato mes ta haci.
Durante e reunion a delibera basta punto cu tin pendiente, pa locual ta Warda Nos Costa pero lamentablemente, ora cu a compila tur e datonan di Warda Nos Costa y minister a scucha tur e cosnan aki, e tambe a lamenta cu e departamento aki a wordo neglisha di e estado aki, pasobra cu nan no tin e ekiponan necesario pa subi caya. Awendia niun hende sa cua malandro tin ariba nos pais. Tin hopi hende ta drenta cu barco, y ta riparabel cu ilegalidad ta crece formalmente ariba Aruba. Pa combati ilegalidad, e departamentonan aki mester ta up to date, den locual ta ekipo y personal. Locual ta departamentonan di IASA, Warda Nos Costa, KPA, CEA, Douane, tur ta departamentonan cu mester traha den lasonan estrecho cu otro, pa por combati ilegalidad y contrabando tambe ariba e pais akinan. Si no tin un cooperacion entre e departamentonan aki, si tin envidia y jaloezie, esaki ta cosnan cu mester barinan for di mesa. Lo mester traha paralelo cu otro, den un cooperacion consistente pa combati locual ta perhudica nos pais Aruba. Y e minister actual tin e vision aki tambe. E no ta bay ta un trabao facil, ya cu pa haya tur e departamentonan aki pa traha hunto, mester tin un consenso den Conseho di Minister cu ta den e direccion aki mester bay, sino lo bay crash, mirando tur loke ta pasando ariba Aruba, segun Sr. Diego de Cuba, lider di sindicato STA.