Lider di sindicato STA, Sr. Diego de Cuba a tuma nota di un publicacion den un matutino, riba cual Sr. de Cuba ta amplia.
Na prome luga, APA ta un di e companianan cu sindicato STA a dedica masha hopi tempo mes na dje. Ki ora cu e trahadonan a grita, nan a duna atencion y a reuni cu gerencia di APA. Sr. de Cuba no ta kere cu ta bay ta diferente tampoco ya cu APA ta un compania hopi importante pa comunidad. STA a enfrenta hopi problema, tempo cu a cuminsa cu subcontratistanan den siguridad, cuanto STA a pleita. Sindicato STA tambe a zorg pa e ser femenino por a forma parti di e cuerpo di siguridad di APA. Tin un monton di cos cu STA a drecha pa e trahadonan di APA y Sr. de Cuba ta sigur cu trahadonan di APA ta gradicido na STA y pa cual nan ta cu STA ainda.
Motibo pa cual STA no ta bay referendum, ta pasobra cu nan no ta wak e necesidad ya cu nan tin e mayoria, cual segun Sr. de Cuba, nan tin e mayoria ainda. Dus nan no ta bay castiga nan hendenan pa haya stress den un referendum. Nan ta prefera di uza e tempo pa cumisna na drecha e CAO ya cu denter di poco lo mester cuminsa negocia un CAO nobo.
Pero tin un grupo chikito di hende cu kier uza e massa pa nan probecho personal. Esaki ta algo masha malo mes. STA ta bringando pa un causa comun pa tur trahado di APA.
Kico a pasa cu e grupito, Sr. de Cuba no sa. Esmas, un di nan tabata shopsteward di STA. Pero lamentablemente el a faya cu STA y directiva di STA mester a royeer e persona aki. E no a notifica sindicato di nada. Si tabata tin algo cu no ta bay bon, por a acerca sindicato.
Si den e referendum cu lo tuma luga diabierna proximo, ta TOPA mester demostra cu e por haya mayoria. Pero den dado caso, TOPA gana e referendum, STA ta hala un banda y laga TOPA traha. STA ta lamenta cu informacionnan falso y eroneo asina ta core rond cu STA no a haci nada pa APA. Sr. de Cuba a sigui bisa cu APA ta un di e companianan cu e miho CAOnan na Aruba, cu varios beneficio.
Tabata tin un turbulencia durante e splitsing caminda cu e waf di Barcadera, unda e waf di container mester a move bay barcadera. E tempo ey caba STA a sobrespasa e tempo ey caba. A yega e momento pa STA bay discuti ariba un contrato colectivo nobo, cual lo ta bay ta un di e miho contractonan colectivo cu APA ta bay conoce. Mirando e hecho di e referendum di diabierna awo, STA ta pidi nan miembronan pa no bay vota, ya cu no tin sentido pa bay vota. Tur e miembronan cu ta confundi si mester bay vota of no, e no ta necesario. Laga TOPA demostra cu e por haya e mayoria, e ora STA ta hala un banda. Si esey no sosode, y STA keda cu mayoria, e ora TOPA tambe mester hala un banda laga STA traha, segun Sr. Diego de Cuba, di sindicato STA.