Un poco mas di dos siman pasa stakeholdernan den desaroyo y construccion di Facilidad Multifuncional (MFA) di Paradera a reuni na e edificio nobo pa un ceremonia di entrega di yabi. Esaki a bay for di man di compania constructor Bic N.V. pa Stichting Onroeroend Goed Aruba (SOGA) y na su luga, nan a entrega esaki na Pais Aruba. Minister President Mike Eman representando Pais Aruba a ricibi e yabi nan y pasa nan pa e Management Team di MFA representa pa sr. Elton Hart como e Manager di MFA Paradera.
Diaranson mainta tempran, MFA Paradera tabata asina leu cu por a habri su portanan pa publico. Pa e ‘soft opening’ tabata tin entre otro clientenan pa e oficina di e laboratorio den e MFA, Departamento di Impuesto y particularmente Hulpbestuurskantoor (HBK) Paradera. Pa exactamente 8’or, sr. Elton Hart a habri porta di MFA Paradera pa prome biaha. Tur cliente cu tabata wardando e porta habri a drenta, tuma nan number y por a sinta comodamente warda nan turno pa por wordo atendi den un ambiente trankil, ameno y den un espacio amplio. Si nan tabata desea esaki, tambe nan por a cumpra algo di come of bebe na e cafetaria cu ta habri for di tempran mainta. Pero a e dia special aki, tur cliente a haya un croket como cu nan ta entre e prome clientenan di e facilidad multi-funcional di Paradera.
Staff di HBK Paradera tabata kier a sorpresa e prome cliente di nan oficina nobo den MFA cu un regalo. E prome cliente a resulta di ta sra. Iris Offerman y a wordo atendi pa Rachelle Flanegin na bali. Despues cu el a haci su transaccionnan, sr. Omar Harms, director interino di bureau MFA, a desea sra. Offerman un bon dia, bon bini y a gradici’e pa haci uzo di servicionan di HBK Paradera, como e prome cliente di nan oficina nobo. Sra. Carina Boekhoudt-Croes chef di hulpbestuurskantoor Paradera, a haci entrega di un bunita basket na sra. Offerman.
Awo cu e facilidad multi-funcional na Paradera ta den operacion, durante e ‘soft opening’ aki, ta bay purba drecha e ultimo detayenan y prepara e facilidad pa e apertura oficial cu ta tuma luga e ultimo siman di luna di october.