E caso di “fraude” di parti Sra. Carnaval, Clarissa A. a tuma un buelta grandi awemerdia ora cu recherche a presenta y detene. Esaki despues cu kehonan a wordo entrega contra su persona di a tuma placa pa ticketnan di mesanan VIP pa e concierto di Marco Antonio Solis cu a tuma luga durante fin di siman pasa. Masnoticia a compronde cu ta varios keho a wordo entrega contra di e persona aki y despues di merdia a detene na Sanicolas. E cargo mas pisa cu e ta wordo acusa di dje ta “oplichting” esta di a tuma placa di hendenan pa ticket di entrada pero esakinan no a ricibi nan ticketnan y consecuentemente a keda sin presencia e concierto mientras cu otronan mester a saca placa extra pa bolbe cumpra ticket pa toch presencia e concierto di Marco Antonio Solis na Harbour Arena Diadomingo cu a pasa. Dialuna’tardi por a scucha Sra. Carnaval 2019, Clarissa duna declaracionnan durante programa di radio serca un DJ conoci pero hopi tabata e comentarionan cu su declaracionnan tabata “poco straño” caminda cu en principio e ta papia di un persona di inicialnan D.K. cu el a laga tene e placa y cu e persona aki a desaparece misteriosamente. Di otro banda, e promotor di e concierto tambe a duna su declaracion y asina ta haci e caso aki mucho mas complica ainda pa Clarissa A. kende actualmente ta deteni y lo mester duna declaracion serca autoridad p’asina haya sa kico realmente a sosode cu e suma cuantioso aki. Durante oranan di Dialuna den dia por a mira videonan caminda e sospechoso A. aki a bai na establecimentonan cu ta presta placa y nos a compronde, of esey tambe A. a declara Dialuna, cu e lo bai paga tur hende nan placa bek y a pidi tambe disculpa publicamente pa loke a sosode. Sigur un situacion hopi fastioso pa ambos partido cu ta meti den e cos aki pasobra awo ta husticia mester bai soluciona e problema aki.