Sr Vicente Ras a ricibi reconocimento pa ta un baluarte cu un carisma grandi pa yuda grandi y chikito

Diadomingo a tuma luga e di 4 Bariofest na Centro di Bario Brazil. Bariofest ta un proyecto di Special Projects bou guia di señora Susanne Van Nes Sinjago y ta resorta directamente bou di Ministerio di Asuntonan Social. Special Projects ta duna oportunidad na pueblo pa nomina baluartenan, personanan cu a resalta den comunidad. Y durante Bariofest, e personanan aki ta wordo reconoci. Den nomber di Minister Glenbert F. Croes, Prome Minister a entrega certificadonan di reconocemento na 5 baluarte di Brazil: Angelo Richardson, Giandrick van den Berg, Luis Inario Maduro, Heintje Ras y Vicente Ras. Cada nominado a resalta den diferente area. Awe nos ta cera siman contando un tiki di señor Vicente Ras.

Cu su 89 aña di edad, señor Vicente Ras, na un manera criyoyo bisa, ta hiba musica den su sanger. E ta un tocado di Tambu y semper dispuesto pa yuda ora ta trata di cultura y tocamento di Tambu. Pa hopi aña, señor Vicente Ras ta aportando cu su canticanan di Tambu entre otro den Festival di Dande, Dia di Himno y Bandera y Dia di San Juan.

Señor Vicente Ras tin un carisma grandi y contagioso cu ta impacta grandi y chikito. E ta duna presentacion tambe dunando informacion y toca na varios scolnan. Tambe e ta toca pa nos grandinan. E sa yuda muchanan cu spreekbeurt tambe. Esakinan e ta haci boluntariamente.

Sodo y Cuero ta e Grupo di Tambu di señor Vicente Ras, reconoci pa pasa Dande di nos antepasadonan, e Dande di Tambu. Tambe nan ta e unico grupo di Tambu actualmente. Nan ta manteniendo e cultura di tambu tocando den diferente evento, fiesta, scol y siñando hoben y adultonan toca tambu pa asina mantene esaki bibo.

Señor Vicente Ras ta un ehempel pa grandi y chikito. For di dje nos por siña cu edad no ta importante pa haci cosnan grandi, sino e amor, pasion y boluntad cu hende tin pa haci cosnan ta e impulso tras di tur logro. Lema di Señor Vicente Ras: “Gusta loke ta di otro, pero stima y aprecia loke ta di bo”.

Den nomber di Gobierno di Aruba y Minister Glenbert Croes, Prome Minister a felicita y gradici señor Vicente Ras pa su trabounan boluntario pa nos muchanan, hobennan y especialmente, treciendo alegria pa nos grandinan.

Comments

comments